12-nji iýunda Türkmenistanda adam hukuklary boýunça ygtyýarly wekil- Adalatçy, hanym Ýazdursun Gurbannazarowa bilen ÝHHG-nyň milli azlyklaryň işi boýunça Ýokary komissary, jenap Kaýrat Abdrahmanowyň arasynda duşuşyk geçirildi. Bu barada ýurdumyzyň Adalatçynyň resmi web-saýtynda habar berilýär.
Duşuşygyň dowamynda jenap Türkmenistanyň hormatly Prezidentiniň ýolbaşçylygynda ýurtda amala aşyrylýan, esasy maksady durnukly ösüşi we halkyň abadançylygyny üpjün etmeklige gönükdirilen syýasy-ykdysady özgertmeleriň oňyn häsiýetini belläp geçdi. Hususan-da, jenap Kaýrat Abdrahmanow ýurtda durmuşa geçirilýän şäher gurluşyk syýasatynyň ajaýyplygyna aýratyn ünsi çekdi we täze gurulýan Arkadag şäheriniň Durnyukly Ösüş Maksatlaryny durmuşa geçirmekdäki möhüm ornuny belläp geçdi.
Taraplar ÝHHG-nyň dürli gurluşlarynyň arasyndaky ikitaraplaýyn hyzmatdaşlygyň oňyn häsiýetine ünsi çekdiler. Özara gatnaşyklaryň üstünlikli mysaly hökmünde, ÝHHG-nyň Aşgabatdaky merkezi bilen ýola goýlan netijeli hyzmatdaşlygy we bilelikde geçirilen çäreleri getirmek bolar.
Duşuşykda aýdylyşy ýaly, ÝHHG-nyň Aşgabatdaky merkezi we bu guramanyň beýleki gurluşlary Adalatçynyň diwanynyň adam hukuklaryny goramak ugrundaky esasy hyzmatdaşlarynyň biridir. Adalatçynyň diwany bilen ÝHHG-nyň dürli gurluşlarynyň arasyndaky hyzmatdaşlygyň çäginde adam hukuklarynyň dürli ugurlarynda birnäçe işler durmuşa geçirildi. Şu nukdaýnazardan iki guramanyň arasyndaky netijeli hyzmatdaşlygyň dowam etmegine uly ähmiýet berilýär.
Duşuşygyň dowamynda hormatly myhmana milli adam hukuklary institutyň alyp barýan işleri we Adalatçynyň diwanynyň mümkinçiliklerini ýokarlandyrmak üçin hyzmatdaşlygyň geljegi uly ugurlary barada maglumat berildi.
Şeýle-de jenap Kaýrat Abdrahmanow ýurdumyzda adam hukuklaryny öňe sürmekde garaşsyz edara hökmünde Adalatçynyň diwanynyň ornunyň ulydygyny belledi.
Duşuşygyň ahyrynda taraplar Adalatçynyň diwanynyň potensiýalyny ösdürmekde mundan beýläkde hyzmatdaşlygy giňeltmägä taýýardyklaryny mälim etdiler.
