Paýtagtymyzdaky ýokanç keselleriň öňüni alyş Merkezinde gepatit keseline garşy Bütindünýä göreş gününe bagyşlanan ylmy maslahat geçirildi.

Bütindünýä Saglygy Goraýyş Guramasynyň Türkmenistandaky wekilhanasy tarapyndan Türkmenistanyň Saglygy goraýyş we derman senagaty ministrligi bilen bilelikde guralan bu çäre sanly ulgam görnüşde geçirildi.

Onuň işine Türkmenistanyň we Aşgabat şäheriniň bäş welaýatyndan kliniki lukmanlar, ýokanç keseller boýunça hünärmenler, laboratoriýa kömekçileri, epidemiologlar, terapewtler we gastroenterologlar gatnaşdy.

“Wirusly gepatitiň öňüni almaklygy güýçlendirmek” temasynda geçirilen maslahatda bagry wirusly gepatitden goramak we wirusly gepatit sebäpli kesel we ölüm derejesini azaltmak üçin öňüni alyş çärelerini giňeltmegiň möhümdigi bellenildi.

Maslahatda gepatite garşy göreşde dünýä, sebit we milli derejede gazanylan öňegidişlikler gözden geçirildi, şeýle hem BSGG-niň goldawy bilen işlenip düzülen we gepatit C-ni bejermek boýunça tassyklanan täze milli teswirnama hödürlenildi.

Bu ýylky gepatit keseline garşy Bütindünýä göreş gününiň temasy «Bir durmuş, bir bagyr» diýlip atlandyrylyp, adamyň sagdyn bolmagy we uzak ýaşamagy üçin bagry gepatitden goramagyň möhümdigine bagyşlandy.