Türkmenistanyň Döwlet çeperçilik akademiýasynda bu ýokary okuw mekdebiniň dizaýn bölüminiň mugallymy Amanmyrat Modyýewiň 40 ýaşynyň dolmagy mynasybetli onuň eserleriniň şahsy sergisi guraldy.

Amanmyrat heniz monumental surat bölüminde okaýarka özüni geljegi uly suratkeş hökmünde görkezmegi başardy. Onuň diplom işi çeperçilik akademiýasynyň kitaphanasyny «Gündogaryň alymlary» atly üç görnüşli surat bilen bezeýär. Suratda Magtymgulynyň, Döwletmämmet Azadynyň we Ibn Sinanyň durmuşyndan iş pursatlary şekillendirilipdir. Amanmyrat Modyýewiň «Alymlaryň dünýäsi» atly başga bir monumental suraty Türkmenistanyň Ylymlar akademiýasynyň Tehnologiýalar merkeziniň eýwanynda ýerleşýär.

Ol akademiýany tamamlandan soňra etraplaryň birinde ýerleşýän çagalar sungat mekdebinde 2 ýyl mugallymçylyk etdi. Soňra bolsa oňa akademiýanyň dizaýn bölüminde mugallymçylyk etmek teklip edildi.

Dizaýn ugry Amanmyradyň işinde anyk yz galdyrdy. Ol eýýäm ownuk suratlardan peýdalanyp, dizaýneriň gözi bilen töweregindäki dünýä seredendigine garamazdan, suratkeş bolup galdy.

Akademiýany tamamlanlaryň bäşisi, şol sanda Amanmyrat Modyýew hem her ýyl öz eserleriniň sergilerini guraýar. Olaryň birinde Amanmyrat «Gyş gawuny» suratyny görkezdi. Surat adaty bolmadyk tanyşdyrylyşy bilen ýatda galdy. Taşizm stilinde, ýagny birmeňzeş zatlary gaýtalamak ritmi bilen ýerine ýetirilen surat reňk sazlaşykly dizaýn edilip, gawunyň gurluşyny görkezýär we ol modern stilinde dizaýn eseri bolupdyr.

Amanmyrat Modyýewiň şu ýylky ýubileý sergisi peýzažlary bilen haýran galdyrdy. Olaryň biri beýlekisinden has owadan.

– Onuň peýzažlary Wan Gogy ýa-da Yzzat Gylyjowyň eserlerini ýatladýar – diýip, sungat tankytçysy Jennet Baltaýewa öz pikirini meniň bilen paýlaşdy.

– Meniň üçin bolsa Martiros Sarýanyň daş-töweregi arassa dünýäsini ýatladýar – diýdim.

– Siziň her biriňiziň pikiriňiz dogry – diýip, Amanmyrat söhbetdeşlige goşuldy. – Ýöne men fransuz neo-impressionizminiň wekili Žorž Sýoryň döredijiliginiň, has dogrusy, peýzažyň täsirleriniň umumylaşdyrylmagynyň muşdagy. Elmydama arassa howada işleýärin, şonuň üçin suratlarymda howa köpdür. Okuwçylarymyza: «Tebigat ilkinji mugallymdyr» diýmekden ýadamok, olara arassa howada işlemegi öwredýärin. Buýsanýan we gowy geljegine garaşýan talyplarym bar. Olardan Jeren Babaýewany, Jeren Ataýewany, Aýbölek Babajanowany, Hatyja Söýünowany agzap bilerin.

Amanmyrat Modyýew 2022-nji ýylda Türkmenistanyň Prezidentiniň yglan eden «Türkmeniň Altyn asyry» atly bäsleşiginiň ýeňijisi boldy, şol ýyl Gazagystanda Türki suratkeşleriň döredijilik bäsleşiginiň hem ýeňijisi boldy we 2019-njy ýylda Kiprdäki Türki suratkeşleriň döredijilik simpoziumyna gatnaşdy.

Amanmyrat Modyýewiň şahsy sergisi tomaşaçylaryň köp bolmagy bilen tapawutlanýar we olaryň hiç biriniň ýaş, gözlegçi, zehinli we häzirki zaman suratkeşiniň işine biperwaý galmandygyny bellemek gerek.