«Ýaş tebigatçy» jemgyýetçilik guramasy we Türkmenistanyň Magtymguly adyndaky Ýaşlar guramasynyň Merkezi geňeşiniň ýanyndaky Türkmenistanyň Çagalar gaznasy deňiz süýdemdirijileri barada surat bäsleşigini yglan etdi.

Bu çäre 19-njy fewralda bellenýän Bütindünýä deňiz süýdemdirijilerini goramak gününe gabat gelýär. Bäsleşige 6–15 ýaş aralygyndaky çagalar we ýetginjekler çagyrylýar. Bäsleşigiň maksady ýaş nesliň ünsüni deňiz süýdemdirijilerini gorap saklamak meselesine çekmekdir.

Islendik tehnikada A3 ölçegli kagyzda ýerine ýetirilen bäsleşik işleri awtoryň familiýasyny, adyny, ýaşyny, eseriň adyny, aragatnaşyk maglumatlaryny özünde jemleýän maglumatlar bilen bilelikde poçta arkaly guramanyň salgysyna iberilip bilner: Aşgabat şäheri, Azady köçesi, 61-nji jaý, «Ylym» neşirýaty.

Bäsleşige gatnaşmak üçin niýetlenen suratlar 2024-nji ýylyň 1-nji fewralyndan 11-nji fewraly aralygynda kabul edilýär. Bäsleşigiň ýeňijileri 2024-nji ýylyň 15-nji fewralynda yglan ediler. Iň oňat 10 eseriň awtorlary Hazar döwlet goraghanasyna gezelenje gitmek hukugyny alarlar. Bäsleşige gatnaşanlaryň hemmesine şahadatnamalar we ýadygärlik sowgatlar gowşurylar.

«Bu bäsleşik çagalara we ýetginjeklere deňiz süýdemdirijileri barada has köp zat öwrenmäge we olary goramagyň zerurlygy barada oýlanmaga kömek eder diýip, umyt edýäris» diýip, «Ýaş tebigatçy» jemgyýetçilik guramasynyň başlygy Leýli Şyhmadowa aýdýar. 2022-nji ýylda döredilen bu gurama çagalaryň we ýetginjekleriň arasynda ylmy we tebigat goragyny wagyz etmek bilen meşgullanýar. Şeýle hem olara ekologiýa we tebigatdan peýdalanmagyň esaslaryny öwretmek hem ýaş nesilde ekologiýa medeniýetini döretmek boýunça çäreler geçirýär.