1–7-nji mart aralygynda Russiýanyň Soçi şäheriniň «Sirius» federal çäginde geçirilen Bütindünýä ýaşlar festiwaly tamamlandy.

Dalaşgärleriň köpüsinden işjeň we başarjaň ýokary okuw mekdepleriniň mugallymlary, talyplar, mekdep okuwçylary hem-de edaralaryň hünärmenleri şeýle uly halkara meýdançasynda Türkmenistana wekilçilik etmäge hukuk gazandylar.

Türkmen wekiliýetine Halkara ynsanperwer ylymlary we ösüş uniwersitetiniň, Türkmenistanyň Daşary işler ministrliginiň Halkara gatnaşyklary institutynyň, Ýagşygeldi Kakaýew adyndaky halkara nebit we gaz uniwersitetiniň, Türkmen döwlet maliýe institutynyň, A.S.Puşkin adyndaky bilelikdäki türkmen-rus orta mekdebiniň, ýurduň Maliýe we ykdysadyýet ministrliginiň, ÝUNISEF-iň we Russiýanyň Aşgabatdaky ilçihanasynyň wekilleri girdi.

Festiwalyň dowamynda türkmen ýaşlary dürli çärelere, okuwlara, tehnologiki görkezişlere we konsertlere, syýasatçylar, alymlar, türgenler, teatr we kino artistleri, sazandalar we meşhur teleýaýlym işgärleri bilen duşuşyklara gatnaşdylar.

Festiwalyň her güni «Her kim üçin mümkinçilikler», «Maşgala», «Köp milletiň agzybirligi» ýaly bir tema bagyşlandy. 150-den gowrak ýurduň wekillerini ýygnan sungat we halk-çeperçilik ýarmarkasynda ildeşlerimiz türkmen halkynyň milli lybaslary, saz gurallary, şaý-sepleri we adaty ýadygärlik sowgatlary tanyşdyrdylar.

Dünýä halklarynyň döwre tansy festiwalyň täsirli we simwoliki wakalarynyň biri boldy. Foruma gatnaşan iki müňe golaý ýaşlary birleşdirip, iň köpmilletli dostluk tansy dünýä rekordyny goýdy, ony rekordlary hasaba alyş «Интеррекорд» halkara agentliginiň ýolbaşçysy Wladislaw Kopylow resmi taýdan tassyklady.

Bütindünýä ýaşlar festiwaly jahanyň dürli künjeginden dünýä biparh garamaýan ýaşlaryň arasynda baglanyşyk gurmak üçin meýdança öwrüldi. Ýaşlar jemgyýetiň durnukly ösüşini üpjün etmekde möhüm orun tutýarlar. Geljekde dünýäni gowulyga üýtgedip biljek ýaş hünärmenler – diplomatlar, telekeçiler, alymlar, türgenler, suratkeşler we beýleki hünärleriň wekilleri bolar.