2-nji aprelde Türkmenistanyň jemgyýetçilik guramalary merkezinde Magtymguly adyndaky Ýaşlar guramasynyň Merkezi geňeşiniň Türkmenistanyň Bilim ministrligi bilen bilelikde internet arkaly guran «Sanly dünýä: Ýaşlar. Ösüş. Geljek» atly okuw-usulyýet maslahaty geçirildi.

Çäräniň maksady işleýän we talyp ýaşlaryň, ýurdumyzdaky orta mekdepleriň mugallymlarynyň arasynda Türkmenistanyň 2024-nji ýylda durmuş-ykdysady ösüşi we maýa goýumlary meýilnamasyny üstünlikli durmuşa geçirmek boýunça derwaýys meseleleriň ýerine ýetirilmegi bilen baglanyşykly düşündiriş işlerini geçirmekden ybaratdy.

Maslahata öz okuw mekdepleriniň mejlis we synp otaglaryndan internet arkaly aragatnaşyga girip, ýurdumyzyň ähli ýokary okuw mekdepleriniň talyplarydyr mugallymlary gatnaşdy. Olar Türkmenistanyň Magtymguly adyndaky Ýaşlar guramasynyň Merkezi geňeşiniň başlygy Ýazpolat Keriýewiň, Türkmenistanyň Mejlisiniň wekilleriniň, Türkmenistanyň Baş prokuraturasynyň Kämillik ýaşyna ýetmedikler we ýaşlar hakyndaky kanunlaryň ýerine ýetirilişine gözegçilik bölüminiň, Türkmenistanyň Döwlet migrasiýa gullugynyň we Türkmenistanyň Içeri işler ministrliginiň, «Türkmentelekom» EAK-nyň Internet tehnologiýalar merkeziniň Programma üpjünçiligi döretmek we goldamak bölüminiň, Türkmen döwlet ykdysadyýet we dolandyryş institutynyň sanly ykdysadyýet kafedrasynyň işgärleriniň duşuşykda eden çykyşlaryny gyzyklanma bilen diňlediler.

Çykyş edenler dürli ugurlaryň sanly ulgama geçişi we ilkinji nobatda, kibernetik sowatlylygyň, ýagny sanly gurşawdan howpsuz we netijeli peýdalanmaga, ýüze çykyp biljek howp-hatardan goranmaga mümkinçilik berýän bilimleridir endikleri edinmek bilen barabar ösýän sanly ykdysadyýetiň ösüşi bilen baglanyşykly meseleler barada aýtdylar. Kibernetik medeniýeti ösdürmegiň zerurlygy bilen birlikde, onuň tehnologik we kanuny esaslary, psihologik şertlere we saglyk ýagdaýyna täsiri-de ara alnyp, jikme-jik maslahatlaşyldy.