Aba Annaýew adyndaky Halkara atçylyk akademiýasynyň kitaphanasynda ýetip gelýän Türkmen bedewiniň milli baýramy mynasybetli «Bir belent ykbal sen illere, bedew!» atly medeni çäre geçirildi.

Türkmenistanyň Magtymguly adyndaky Ýaşlar guramasynyň Merkezi geňeşiniň başlygynyň orunbasary Döwletgeldi Durdymuhammedowyň ýolbaşçylyk eden bu duşuşygynda Halkara ahalteke atçylyk sport toplumynyň tälimçisi, Türkmenistanyň halk seýisi Suhandurdy Guljanow, «Türkmen atlary» döwlet birleşiginiň atçylyk boýunça ylmy-önümçilik merkeziniň işgäri Merdan Daýhanow, ÝUNESKO-nyň «Ahalteke atlary — parahatçylygyň ilçileri» klubunyň başlygy Atanur Klyşow, Aba Annaýew adyndaky Halkara atçylyk akademiýasynyň mugallymlary, bu ýokary okuw mekdebiniň Ýaş alymlar geňeşiniň ýolbaşçysy Söýenç Ahmedow we beýleki myhmanlar çykyş etdiler.

Olar öz çykyşlarynda ahalteke atşynaslygy ösdürmek, türkmen halkynyň milli buýsanjy bolan ahalteke atlarynyň tohum arassalygyny gorap saklamak, olaryň sanyny artdyrmak, bu gadymy tohumy ylmy taýdan öwrenmek üçin ähli şertleri döretmek we halkara hyzmatdaşlygy ösdürmek boýunça ýurdumyzda alnyp barylýan giň göwrümli işiň netijeliligini bellediler. Şeýle hem milli gymmatlyklaryň ähmiýetini ýokarlandyrmagyň we olary wagyz etmegiň, ýaşlaryň bu işe, çapyksuwarlyga we at sporty bilen meşgullanmaga işjeň çekilmeginiň möhümdigi-de nygtaldy. Duşuşyga gatnaşan talyplar myhmanlara özlerini gyzyklandyrýan sowallary berip, olara kanagatlanarly jogaplar aldylar.

Duşuşykda ýaňlanan aýdym-sazly çykyşlar oňa gatnaşanlara ruhy joşgun paýlady. Çärä gatnaşanlar akademiýanyň kitaphanasynda açylan sergä hem syn etdiler. Onda Türkmenistanyň Prezidenti Serdar Berdimuhamedowyň we türkmen halkynyň Milli Lideri, Halk Maslahatynyň Başlygy Gurbanguly Berdimuhamedowyň kitaplary, şeýle hem ahalteke bedewleriniň bezegleri we behişdi bedewler şekillendirilen suratlar görkezildi.