Türkmen döwlet neşirýat gullugynyň Neşirýat-çaphana orta hünär okuw mekdebinde «Gül diýaryň ýüregi Aşgabat» atly ylmy-amaly maslahaty geçirildi.

Gündogaryň beýik akyldary, nusgawy şahyry Magtymguly Pyragynyň doglan gününiň 300 ýyllygyna we Aşgabat şäheriniň 143 ýyllygynyň bellenilmegine bagyşlanan bu çärä ugurdaş gurluşlaryň wekilleri, redaktorlar, metbugat işgärleri, okuw mekdebiniň mugallymlary we talyplary gatnaşdylar.

Çärede Türkmenistanyň halk suratkeşi Saragt Babaýew, «Türkmenistanyň gurluşygy we binagärligi» žurnalynyň baş redaktory Ýazgül Ezizowa we ylymlaryň kandidaty Maksat Amanow dagy çykyş etdiler.

Magtymguly Pyragynyň ýadygärliginiň we «Magtymguly Pyragy» medeni-seýilgäh toplumynyň açylmagy maslahatyň esasy temalarynyň biri boldy. Saragt Babaýewiň ýolbaşçylygyndaky uly topar türkmen halkynyň beýik şahyry we akyldary Magtymguly Pyragynyň şeýle kaşaň heýkelini döretdiler. Heýkeller kompozisiýasynyň awtory ýerine ýetirilen işleri we ýadygärligiň aýratynlyklary barada gürrüň berdi.

Magtymguly Pyragynyň 60 metrlik ýadygärligi tebigatyň goýnundaky depede oturdyldy. Şol bir wagtyň özünde, «Türkmeniň» goşgusyndan setirler we türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz Gurbanguly Berdimuhamedowyň «Pähim-paýhas ummany Magtymguly Pyragy» goşgusyndan setirler 25 metrlik postamentde oýulyp ýazylypdyr. Şeýlelikde, ýadygärlik şahyryň belent şahsyýetini we dünýä edebiýatynyň aýrylmaz bölegi bolan baý döredijilik mirasyny görkezýär.

Maslahatyň dowamynda hormatly Prezidentimiz Serdar Berdimuhamedowyň «Änew — müňýyllyklardan gözbaş alýan medeniýet» atly kitabynda jikme-jik beýan edilen gadymy Änew şäheriniň binagärlik mirasy barada, kanuny esasynda döwlet derejeli diýen aýratyn derejä eýe bolan Arkadag şäheri barada çykyşlar boldy. Türkmenistanyň ak mermer paýtagtynyň binagärlik bezegleri barada aýratyn tema bagyşlandy.