Çagalary goramagyň halkara gününiň öňüsyrasynda Lebap welaýatynyň köpugurly hassahanasyna Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň serişdeleriniň hasabyna satyn alnan iki sany «Dialog+» kysymly gemodializ enjamy sowgat berildi.

Bu çärä bagyşlanan dabara Saglygy goraýyş we derman senagaty ministrliginiň we welaýatyň saglygy goraýyş edaralarynyň wekilleri, şeýle hem gaznadan bölünip berlen serişdeleriniň hasabyna bejergi alan we saglygyny dikelden çagalar gatnaşdylar.

Çykyş edenleriň belleýşi ýaly, ýurdumyzda lukmançylyk kömeginiň hilini ýokarlandyrmak ugrunda yzygiderli iş alnyp barylýar. Muňa türkmen halkynyň Milli Lideri Gahryman Arkadagymyzyň tagallasy netijesinde gurlan täze köpugurly hassahana mysal bolup biler.

Döwrebap lukmançylyk edarasynyň işläp başlan döwründen bäri müňlerçe hassa saglygyny dikeltdi.

Täze lukmançylyk enjamlary ekstrakorporal usulda gan arassalamaga mätäçlere kömek eder. «B.Braun» kompaniýasynyň öňdebaryjy nemes öndürijisiniň has döwrebap tehnologiýasy esasynda işlenilip taýýarlanylan «Dialog+» kysymly enjamy böwrek keselleriniň köp görnüşini bejermäge mümkinçilik berer.

Ilatyň saglygyny goramak saglygy goraýyş pudagynda döwlet syýasatynyň ileri tutulýan ugurlaryndan biridir. Şundan ugur alnyp, ýurdumyzda «Saglyk» Döwlet maksatnamasy üstünlikli durmuşa geçirilýär.

Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy ýaş nesliň saglyk meselelerini çözmekde möhüm kömek edýär.

Gazna döredileni bäri geçen döwürde welaýatyň saglygy goraýyş edaralaryna tiz kömek ulaglary, anyklaýyş enjamlary we lukmançylyk enjamlary sowgat berildi. Şeýle hem elliden gowrak çagany operasiýa etmek üçin çykdajylara serişdeler bölünip berildi.