2024-nji ýylyň 21-nji iýunynda Russiýa Federasiýasynyň we Türkmenistanyň Gahrymany, 1-nji derejeli gözükdiriji-synagçy-kosmonawt, «Roskosmos» Döwlet korporasiýasynyň kosmonawt toparynyň serkerdesi Oleg Kononenkonyň 60 ýaşy dolar. 1-nji iýunda HKB bilen birleşjek kosmos gämisi ýubilýara sowgat hökmünde elde öndürilen kemput alyp barýar.
Oleg Dmitriýewiç Kononenko 1964-nji ýylyň 21-nji iýunynda Türkmenistan SSR-niň Çärjew (häzirki Türkmenabat) şäherinde dünýä inýär. 1981-nji ýylda ol ýerdäki 15-nji orta mekdebi tamamlaýar. Oleg Kononenko kosmonawtika hakynda hut türkmen topragynda, çagalykdan arzuw edip başlaýar. Onuň özüniň aýtmagyna görä, ol kosmonawt bolmak kararyna Harkowyň N.E.Žukowskiý adyndaky uçarçylyk institutyna girmezden has öň gelipdir. Ol bu instituty 1988-nji ýylda «inžener-mehanik» derejesi berilmek bilen, «Uçýan abzallaryň hereketlendirijileri» hünäri boýunça tamamlaýar.
Oleg Kononenko häzirki wagtda HKB-de bir ýyllyk ekspedisiýada, bu uçuş onuň iş tejribesindäki bäşinji uçuşdyr. Ol eýýäm kosmos uçuşlarynyň umumy dowamlylygy boýunça täze dünýä rekordçysy boldy. Häzirki ekspedisiýa tamamlanandan soň (meýilnama boýunça ‒ 2024-nji ýylyň 23-nji sentýabry), kosmonawt Oleg Kononenkonyň uçuşda geçiren umumy wagty 1110 gije-gündiz bolar.
Golaýda TASS bilen geçirilen söhbetdeşlikde Oleg Kononenko: «Kosmonawt hemişe öwrenmeli we özüňi akyl hem jismi taýdan gowy durkda saklamaly hünärdir. Meniň üçin bolsa bu örän möhüm. Ýaşaýşa höwesjeň bolmagy, işjeň bolmagy, bilimleriň iň ýokary derejesine çykmagy we iň soňky üstünlikleri täzeläp durmagy, şeýle hem gözýetimimi yzygiderli giňeltmegi halaýaryn».
Elbetde, bir gezek başdan geçiren agramsyzlyk duýgyň goşmaça hyjuw berýär we kalbyňy kosmos uçuşyny gaýtalamak islegi bilen doldurýar. Oleg Dmitriýewiçiň aýtmagyna görä, orbitada ylmy synaglar geçirmek onuň üçin hemişe-de gaty gyzykly bolupdyr, sebäbi bu alymlaryň Ýer ýüzünde geçirýän agtaryşlaryna we olaryň adamzadyň möhüm meseleleri çözmekde ulanýan netijelerine aýrybaşga suratda gatnaşmak duýgusyny döredýär.
