Arkadag şäheriniň açylmagynyň birýyllyk senesi mynasybetli Aşgabatda «Oguz hanyň Kibersport kubogy» ugrunda kibersport boýunça giň gerimli ýaryş geçirildi.
Ýaryşa talyplar, dürli ýaşdaky we hünärdäki ýaşlar, bu waka ýürekden gyzyklanma bildiren, kibersportda çykyş edip, öz ukyp-başarnyklaryny görkezmek islän türkmenistanlylar işjeň gatnaşdylar. Ýaryşyň şeýle görnüşde geçirilmegi ony gatnaşyjylar üçin has-da özüne çekiji etdi. Dartgynly ýaryşlar Türkmenistanyň Oguz han adyndaky Inžener-tehnologiýalar uniwersitetiniň «Kibersport» merkeziniň binýadynda geçirildi we bu ýokary okuw mekdebi ýaryşyň guramaçysy hem hemaýatkäri bolup çykyş etdi.
Utulan çykdy duşuşygynyň netijesinde, kibersportuň Counter-Strike 2, Dota 2 we EA Sports FC 2024 ýaly meşhur görnüşleri boýunça ýaryşa gatnaşmaga hukuk alan toparlar we oýunçylar kesgitlenildi. Counter-Strike 2 we Dota 2 görnüşleri boýunça ýaryşlaryň hersinde 16 topar çykyş etdi, 21 oýunçy EA Sports FC 2024 görnüşi boýunça oýunlara gatnaşdy. Gatnaşanlaryň ählisi Türkmenistanyň öňbaşçysy hem-de iň oňat kibertürgenleri diýen ada eýe bolmak ugrunda mynasyp göreşdiler.
Ýaryşyň Counter-Strike 2 we Dota 2 görnüşleri boýunça final oýunlarynyň ikisinde-de birinji orunlary Oguzhan topary eýeledi. Ikinji orna Aşgabat Ýalkym we Diýar Team toparlarynyň kibertürgenleri mynasyp boldular. Ýaryşyň EA Sports FC 2024 görnüşi boýunça finalda ýeňiji diýlip Meýsam Ameri atly oýunçy görkezildi. Mekan Nazarow hem-de Zekeriýa Ertekow degişlilikde ikinji we üçünji orunlary eýelediler.
Baýrakly orunlary eýelänlere şahadatnamalar we gymmat bahaly sowgatlar gowşuryldy.
Giň gerimli ýaryş dürli ýaşdaky adamlaryň arasynda kibersporta gyzyklanmanyň artýandygyny görkezdi. Şeýle çäreleriň esasy wezipesi doly derejeli sportuň görnüşi hökmünde kibersporty wagyz etmekden, şeýle hem The International (Dota 2) we Major (Counter-Strike 2) görnüşleri boýunça halkara ýaryşlarynda türkmen kibertürgenleriň orunlaryny pugtalandyrmak maksady bilen, ýokary derejeli türgenleri taýýarlamakdan ybaratdyr.
Ýaryşyň geçirilmegi ýurdumyzda ýokary tehnologiýaly sport bolan kibersportuň depginli ösdürilýändigini aýdyň görkezdi. Ýokary tehnologiýalar häzirki wagt biziň ýaşaýyş durmuşymyzyň ähli ugurlaryna yzygiderli ornaşýar hem-de onuň bilen aýrylmaz arabaglanyşyklydyr.
Çäräniň ýurdumyzda 29-njy iýunda belleniljek Arkadag şäheriniň açylmagynyň bir ýyllygyna bagyşlanmagy tötänden däldir. Sanly ulgam binýadyna daýanýan döwrebap «Akylly» şäher öňdebaryjy sanly, maglumat-kommunikasiýa, «Ýaşyl» tehnologiýalaryny hem-de şunuň bilen birlikde, binagärlik we bezeg babatda türkmen milli binagärliginiň däpleriniň gözelligini hem-de häzirki zaman usullaryny özünde sazlaşykly utgaşdyrýar. Türkmenistanyň merjeni we türkmen halkynyň buýsanjy Arkadag şäheri ýerli ýaşaýjylaryň, daşary ýurtly syýahatçylaryň hem-de bu täsin şäheriň gaýtalanmajak täsirlerine beslenmek isleýän beýleki myhmanlaryň ünsüni hemişe özüne çekýär.
