Paýtagtymyzda geçirilýän «Uglewodorod ýataklaryny özleşdirmekde tehnologiýalary ornaşdyrmagyň ekologik jähetler» (TESC 2024) atly halkara ylmy-amaly maslahatynda nebit we gaz pudagynyň öňdebaryjy uniwersitetleriniň wekilleri çykyş etdiler.
Ýagşygeldi Kakaýew adyndaky Halkara nebit we gaz uniwersitetiniň ylmy işler boýunça rektoryň orunbasary Ýakupgeldi Amannyýazow «Täze tehnologiýalar we energiýa geçişi boýunça geljege bolan garaýyş» atly mowzuklaýyn mejlisiň çäginde öz gazananlaryny hödürledi. Ol öz çykyşlarynda uniwersitetiň Russiýanyň, Belarusyň, Rumyniýanyň, Gazagystanyň, Malaýziýanyň, Birleşen Arap Emirlikleriniň, Germaniýanyň, Awstriýanyň, Italiýanyň, Koreýanyň, Özbegistanyň, Hytaýyň we beýleki ýurtlaryň öňdebaryjy ýokary okuw mekdepleri bilen nebit we gaz pudagynda, ylym-bilim pudagynda özara bähbitli halkara hyzmatdaşlygy işjeň ösdürýändigini nygtady.
Türkmenistanyň Prezidenti Serdar Berdimuhamedowyň Karary bilen tassyklanan «Türkmenistanyň wodorod energiýasy babatda halkara hyzmatdaşlygy ösdürmek boýunça 2022-2023-nji ýyllar üçin Ýol kartasynda» kesgitlenen wezipeleri durmuşa geçirmek maksady bilen, Ýagşygeldi Kakaýew adyndaky Halkara nebit we gaz uniwersiteti «Tebigy gazdan wodorod energiýasyny almagyň tehniki mümkinçilikleri» mowzugynda maslahat geçirdi. Şeýle hem Wodorod energetikasy merkezi döredildi, onuň ýerliginde bolsa tebigy gazy wodoroda we tehniki ugleroda öwürýän «Plazmatron» atly plazma-himiki desga işlenip taýýarlandy.
THE (Times Higher Education) atly bütindünýä reýting guramasy tarapyndan geçirilýän «Impact Rankings 2022» we «Impact Rankings 2023» reýting görkezijileriniň çäginde Ýagşygeldi Kakaýew adyndaky Halkara nebit we gaz uniwersiteti iki ýyl yzygider dünýä uniwersitetleriniň sanawyna girizildi. 2022-nji ýylyň oktýabrynda uniwersitet ylmy gözleg we okuw-usulyýet işleriniň netijesinde uniwersitetleriň dünýä reýtinginiň sanawyna gaýybana agza hökmünde girizilipdi.
2023-nji ýylda Ýagşygeldi Kakaýew adyndaky Halkara nebit we gaz uniwersiteti Aziýa uniwersitetleriniň Assosiasiýasynyň we Tehniki uniwersitetleriň Assosiasiýasynyň doly agzasy hökmünde kabul edildi. Ol Indoneziýanyň uniwersiteti tarapyndan her ýyl geçirilýän «UI Green Metric» dünýä uniwersitetleriniň ekologik reýtinginiň sanawyna-da girizildi.
Häzirki wagtda uniwersitetiň alymlary tarapyndan buraw guýularynyň boşlugyndaky artyk howany gysyp çykarýan desga işlenip taýýarlandy. Bu desga «Galkynyş» ýatagynda synagdan üstünlikli geçdi.
Şeýlelikde, Ýagşygeldi Kakaýew adyndaky Halkara nebit we gaz uniwersitetiniň «TESC 2024» halkara ylmy-amaly maslahata gatnaşmagy onuň ähmiýetini we dünýä energetikasyna hem ylmyna goşandyny açyk-aýdyň görkezdi. Bu bolsa şu pudakda mundan soňky hyzmatdaşlyk we innowasion gözlegleri üçin mümkinçilikleri ýüze çykarýar.
