Paýtagtymyzda geçirilýän «Uglewodorod ýataklaryny özleşdirmekde tehnologiýalary ornaşdyrmagyň ekologik jähetler» (TESC-2024) atly Halkara ylmy-amaly maslahatynyň ikinji güni BMG-niň wekilleri bilen bilelikde guralan açyk tanyşdyrylyşy bilen açyldy.

«Energetika goşulyşmasy we söwda arkaly energetika howpsuzlygyny we energiýa ulgamlarynyň durnuklylygyny ýokarlandyrmak» mejlisinde energetika pudagynyň hünärmenleri çykyş etdiler. Türkmenistanyň Döwlet energetika institutynyň işgäri Aganyýaz Jumanyýazow öz çykyşynda türkmen ýokary okuw mekdebiniň halkara guramalary bilen ýurdumyzda «ýaşyl» wodorod energetikany ösdürmek ugrundaky hyzmatdaşlygy barada gürrüň berdi.

Institutyň ÝHHG-niň Aşgabatdaky merkezi, Halkara energetika guramasy (IEA) we atom energiýasy boýunça halkara agentligi (IAEA) bilen hyzmatdaşlygyň çäklerinde dürli taslamalaryň işlenip taýýarlanandygyny we durmuşa geçirilendigini bellemek gerek. Olaryň arasynda «Türkmenistanda «ýaşyl» wodorod energetikany ösdürmegiň «Ýol kartasy», «ýaşyl wodorod» öndürmek boýunça synag taslamasy we alysdaky ilatly ýerleriň gün-wodorod elektrik üpjünçiligi ulgamy üçin synag taslamasyny durmuşa geçirmek konsepsiýasy bar.

Taslamalary üstünlikli durmuşa geçirmek üçin ýagdaýy seljermek we ösüşiň geljegini çaklamak ýaly hasaplama usullary ulanylýar. Wodorod energetikasynyň pudaklaryň dekarbonizasiýasy we energiýa netijeliligini ýokarlandyrmak ýaly peýdalary bu tehnologiýany durnukly ösüşiň möhüm bölegine öwürýär.

Çäräniň ahyrynda maslahaty alyp baryjy halkara guramalary bilen hyzmatdaşlygyň Türkmenistanda «ýaşyl» wodorod energetikasynyň ösmeginde möhüm ähmiýete eýedigini nygtady.

Synag taslamalary durmuşa geçirmek we strategiýalary ösdürmek arkaly ýurdumyz arassa energiýa çeşmelerine esaslanýan durnukly we innowasiýa geljegine barýar.