Aşgabatdaky Fransiýa medeniýet merkezinde Bütindünýä daşky gurşaw gününe bagyşlanyp zyňyndylardan ýasalan önümleriň sergisi geçirildi.

«Ýaş tebigatçy» Jemgyýetçilik guramasynyň we «Goşmaça bezeg» («Дизайн плюс») döredijilik birleşiginiň guran sergi-bäsleşige 40-dan gowrak adam gatnaşdy. Türkmenistanyň dürli künjeklerinden höwesjeňler kreatiw işlerini bäsleşige iberdiler.

– Zyňyndylardan zat ýasamak ýaşlaryň estetiki we ekologiýa terbiýesiniň möhüm bölegidir – diýip «Goşmaça bezeg» döredijilik birleşiginiň başlangyç toparynyň başlygy Täjigül Gurbanowa gürrüň berýär.

– Bäsleşige her hilli döredijilikli işleriň ençemesi hödürlendi, şonuň üçinem biz sergini birnäçe zala böldük. Olaryň birinde mekdebe çenli çagalaryň we ýetginjekleriň önümleri, beýlekisinde, höwesjeňleriň özboluşly işleri goýuldy. Milli medeniýete bagyşlanan serginiň üçünji bölüminde milli äheňde iň gowy işler görkezildi.

Işlere ideýanyň özboluşlylygy, ýerine ýetirilişi, estetiki täsir we zyňyndylaryň ulanylyşy boýunça baha berildi. 

Çäräniň guramaçylarynyň we eminleriň pikirine görä, zyňyndydan ýasalan işleriň bäsleşigi diňe bir oňa gatnaşyjylaryň haýran galdyryjy kreatiwligini görkezmän, eýsem, serişdelerden durnukly peýdalanmagyň we zyňyndylary gaýtadan işlemegiň ähmiýetini hem görkezdi. Şonuň üçinem oňa gatnaşanlaryň hemmesine şahadatnamalar we höweslendiriş baýraklary gowşuryldy.

Serginiň myhmanlary zyňyndylardan ýasalan üýtgeşik önümlere gyzyklanma bildirdiler we sergide goýlan her zada oňyn gowy baha berdiler.