27-28-nji iýunda Türkmenistanyň Daşary işler ministrliginiň Halkara gatnaşyklary institutynyň Durnukly ösüş maksatlary boýunça Ylmy we usulyýet merkezinde Aşgabatda we Arkadag şäherinde ýerleşýän metbugat wekilleriniň gatnaşmagynda okuw geçirildi.

BMG-niň Türkmenistandaky wekilhanasynyň hünärmenleri ýygnaga gatnaşanlara 17 sany durnukly ösüş maksadynyň (DÖM) her biri we ýurdumyzda gazanylan soňky üstünlikler barada maglumat berdiler.

11-nji DÖM-iň şäherleriň we oturymly ýerleriň açyklygyny, howpsuzlygyny, çydamlylygyny we daşky gurşawynyň durnuklylygyny üpjün etmäge gönükdirilen «Durnukly şäherler we oturymly ýerler» babatyndaky talaplaryna doly laýyk gelýän mynasyp modelleriň biri-de Arkadag şäheridir.

Şu günler göreldeli «akylly» we «ýaşyl» tehnologiýalar şäheri açylyşynyň ilkinji ýyllygyny belleýär.

Arkadag şäheriniň 21 sany halkara şahadatnama we baýraga mynasyp bolandygyny ýatladýarys. Olar:

– Russiýa Federasiýasynyň Gurluşyk we ýaşaýyş jaý hem jemgyýetçilik hyzmatlary ministrliginiň Merkezi ylmy-agtaryş we taslama institutynyň garaşsyz ylmy-tehniki gözlegleriniň netijelerine laýyklykda, Durnukly ösüş maksatlaryna we ekologik taýdan zyýansyz gurluşygyna bildirilýän halkara talaplara laýyk gelýändigi baradaky şahadatnamasy;

– Durnukly ösüş maksatlarynyň we Türkmenistanda täze şäher gün tertibiniň berkarar edilmegine goşant goşýan giň gerimli, howpsuz, durnukly we akylly sebitleriň ýörelgelerini durmuşa geçirmek ugrundaky tagallalary üçin Arkadag şäherine BMG-niň minnetdarlyk «Habitat» şahadatnamasy.

Şeýle hem çäräniň dowamynda Türkmenistanyň durnukly energetikany ösdürmek, bilimiň hilini ýokarlandyrmak, sagdyn durmuş ýörelgesini, abadançylygy we ilatyň mynasyp ýaşaýyş şertlerini üpjün etmek üçin halkara guramalar bilen özara gatnaşygy baradaky başlangyçlary we tejribesi ara alnyp maslahatlaşyldy.