Türkmenistanyň Döwlet gümrük gullugynyň Merkezi edarasynda Halkara söwda merkeziniň bilermenleri Adelina Harunzhene we Alekseý Bondarenko hem-de bu guramanyň Türkmenistandaky wekilleri bilen duşuşyk geçirdi.
Duşuşygyň esasy mowzugy gümrük amallaryny sadalaşdyrmak taslamasynyň durmuşa geçirilmegi boldy. Ýewropa Bileleşigi bilen Halkara söwda merkeziniň «Türkmenistan: Söwdanyň durnuklylygyny we integrasiýany ýokarlandyrmak» atly bilelikdäki taslamasy şu ýylyň başynda herekete girizildi. Taslamanyň wezipesi Bütindünýä Söwda Guramasyna girmek prosesinde Türkmenistany goldamakdy.
Taraplar gümrük amallaryny sanlylaşdyrmak, töwekgelçilikleri dolandyrmak ulgamynyň ulanylyşy boýunça okuw çärelerini gurnamak, şeýle hem elektron nobatlarynyň dolandyryş ulgamyny ornaşdyrmak üçin daşary ýurda sapara gitmek ýaly meseleleri ara alyp maslahatlaşdylar.
Halkara söwda merkeziniň wekiliýetiniň sapary, şeýle hem BSG-niň söwdany ýeňilleşdirmek baradaky ylalaşygy we Söwda ýeňilleşdiriş boýunça milli komitetiniň ýörelgesi boýunça döwlet işgärleri üçin üç günlük okuwy öz içine alýar.
