Türkmenistanyň Magtymguly adyndaky Ýaşlar guramasynyň şäher hem-de welaýat geňeşlerinde Türkmenistanyň Ýaşlar baýragyna hödürlenilýän dalaşgärlerden resminamalaryň kabul edilmegi dowam edýär.
Gatnaşmaga dürli ulgamlarda – edebiýatda, sungatda, medeniýetde, ylymda we tehnikada, lukmançylykda, sportda, oba hojalygynda, jemgyýetçilik işlerinde uly ösüşleri, döredijilik we zähmet işjeňligini görkezen ýurdumyzyň 16 ýaşdan 35 ýaşa çenli ýaş raýatlary çagyrylýar. Bu baýraga eýe bolmaga ozal ony almadyk ýaşlar dalaşgärlik edip biler.
Dalaşgärlerden resminamalar Türkmenistanyň Magtymguly adyndaky Ýaşlar guramasynyň Aşgabat we Arkadag şäherleriniň, şeýle hem ýurdumyzyň welaýatlarynyň geňeşleri tarapyndan 15-nji sentýabra çenli kabul edilýär we garalýar. Soňra hödürlenilýänler baradaky maglumatlar Türkmenistanyň Magtymguly adyndaky Ýaşlar guramasynyň Merkezi Geňeşine iberilýär, şol ýerde Türkmenistanyň Ýaşlar baýragyny gowşurmak barada gutarnykly çözgüt kabul edilýär.
Gatnaşmak isleýänler aşakdaky resminamalary: 3x4 ölçegdäki 6 sany reňkli fotosurat, pasportyň nusgasy, gazanan üstünlikleri üçin berlen Hormat hatlarynyň, diplomlaryň, metbugatda çap edilen döredijilik işleriniň nusgalary, halk köpçüliginiň we jemgyýetiň öňünde eden işlerini görkezýän fotosuratlar, CD we DVD ýazgylary, okaýan ýa-da işleýän ýerinden häsiýetnama, Magtymguly adyndaky Ýaşlar guramasyna agzalyk hakynda şahadatnama tabşyrmalydyr.
Baýraga dalaşgärler ministrlikler, pudaklaýyn dolandyryş edaralary, döwlet edara-kärhanalar, jemgyýetçilik we döredijilik guramalar, ylym, bilim, saglygy goraýyş edaralar, ýokary we orta hünär okuw mekdepler, şeýle hem köpçülikleýin habar beriş serişdeleri tarapyndan hödürlenilip bilner.
Çäre baradaky giňişleýin maglumatlar Türkmenistanyň Magtymguly adyndaky Ýaşlar guramasynyň Merkezi Geňeşiniň saýtynda ýerleşdirildi. Habarlaşmak üçin telefon belgi: (+993 12) 44-88-55.
Bu çäre Türkmenistanyň Magtymguly adyndaky Ýaşlar guramasynyň döredilen güni mynasybetli her ýyl geçirilýär. Ýeňijileri Türkmenistanyň Ýaşlar baýragy bilen sylaglamak dabarasy Türkmenistanyň Magtymguly adyndaky Ýaşlar guramasynyň döredilen güni bolan 16-njy noýabrda geçiriler. Türkmenistanyň Ýaşlar baýragynyň eýelerine Türkmenistanyň Magtymguly adyndaky Ýaşlar guramasynyň Merkezi Geňeşiniň şahadatnamalary we gymmat bahaly sowgatlary gowşurylar. 1991-nji ýyldan bäri ýurdumyzyň zehinli ýaşlarynyň mümkinçiliklerini hemme taraplaýyn ösdürip, olar bilen depginli we köp taraply işleri alyp barýan Ýaşlar guramasy şu ýyl özüniň 33 ýyllygyny bellär.
Türkmenistanyň Magtymguly adyndaky Ýaşlar guramasynyň Türkmenistanyň Ýaşlar baýragy, Watanyň durmuşyna yhlasly gatnaşandygy hem-de Türkmenistanyň ösüşine şahsy goşandyny goşandygy üçin ýurduň başlangyçlary bilen çykyş edýän, zehinli we aýratyn tapawutlanan ýaş nesillerine her ýyl gowşurylýan belent sylagdyr.
