Her ýylyň 12-nji awgustynda bellenilýän Halkara ýaşlar güni Türkmenistanda hem baýram edildi. Baýramçylyk mynasybetli dünýäniň ösüşinde we gurluşynda özüniň ornuny görkezmek isleýän ýüzlerçe ýaşlar «Arkaç» söwda-dynç alyş merkezinde ýygnandy.

Olar media boýunça sowatlylygyny, gender deňligi babatda bilimlerini artdyrdylar we sanly howpsuzlygy üpjün etmegiň ähmiýetini ara alyp maslahatlaşdylar. Baýramçylykda ýaş gimnastikaçylaryň çykyşlary we şowhunly fleşmob boldy.

Bu senäni aýratyn belläp geçmek 1999-njy ýylyň awgust aýynyň 8–12-si aralygynda Portugaliýanyň paýtagty Lissabon şäherinde dünýä ýurtlarynyň ýaşlar guramalarynyň gatnaşmagynda geçirilen halkara konferensiýada ara alnyp maslahatlaşyldy we BMG-niň Baş Assambleýasynyň çözgüdi esasynda resmileşdirildi.

Halkara ýaşlar güni ilkinji gezek 2000-nji ýylyň 12-nji awgustynda bellendi. 2024-nji ýylda baýramçylygyň temasy «Ýaşlyk we innowasiýa: geljegi döretmek» boldy.