Aşgabatda howanyň üýtgemegi bilen baglanyşykly iş maslahaty geçirildi. Duşuşyk Türkmenistanyň Daşky gurşawy goramak ministrliginiň Birleşen Milletler Guramasynyň Ösüş maksatnamasy bilen bilelikde durmuşa geçirýän «Türkmenistanda Durnukly şäherler: Aşgabatda we Awazada «ýaşyl» şäherleriň toplumlaýyn ösüşi» taslamasynyň çäklerinde guraldy.

Bu çäre dürli ministrlikleriň we pudaklaýyn edaralaryň wekilleriniň gatnaşmagynda Türkmenistanyň Daşary işler ministrliginiň utgaşdyrylmagynda geçirildi.

Iş duşuşygy ministrlikleriň we pudak edaralarynyň wekillerini BMG-niň Howanyň üýtgemegi baradaky Çarçuwaly konwensiýasy boýunça Dördünji Milli habary (4 MH) we Türkmenistanyň birinji iki ýyllyk hasabatyny (1 IH) taýýarlamagyň barşy bilen tanyşdyrmaga, şeýle hem klimat boýunça Pariž şertnamasynyň çäklerinde Türkmenistanyň Milli derejede kesgitlenen goşandy (MDGK) çärelerini durmuşa geçirmegi ara alyp maslahatlaşmaga bagyşlandy.

Şeýle hem oňa gatnaşanlar metan boýunça ählumumy borçnamanyň ýerine ýetirilişi we Türkmenistanyň HÜÇK-nyň Taraplarynyň maslahatynyň 29-njy mejlisine gatnaşmagyna taýýarlyk bilen baglanyşykly meselelere garadylar. Bu çäre şu ýylyň noýabr aýynda Bakuwda geçiriler.

Iş maslahaty Türkmenistanyň döwlet edaralarynyň howanyň üýtgemegi babatynda Birleşen Milletler Guramasynyň Ösüş maksatnamasy (BMG-niň ÖM) bilen bilelikdäki taslamalary durmuşa geçirmekdäki tagallalaryny netijeli utgaşdyrmaga niýetlenildi. Ol ählumumy klimat şertnamalarynyň çäklerinde Türkmenistanyň borçlaryny ilerletmäge we üstünlikli ýerine ýetirmäge täze itergi berer.