Türkmenistanyň Prezidentiniň ýanyndaky Arkadag şäheriniň gurluşygy baradaky Döwlet komitetiniň başlygy D.Orazowyň ýolbaşçylygyndaky Türkmenistanyň wekiliýeti 3-5-nji sentýabr aralygynda Koreýa Respublikasynyň Seul şäherinde geçiriljek Bütindünýä «akylly şäherler» – World Smart City Expo sergisine gatnaşar.
Saparyň maksady tutuş milli şähergurluşygy üçin nusga bolup hyzmat edýän türkmen halkynyň Milli Lideri Gurbanguly Berdimuhamedowyň başlangyjy bilen gurlan ilkinji «akylly» şäher – Arkadag şäheriniň ösüşini görkezmekdir.
WSCE sergi pawilionynda kompýuter we akylly-tehnologiýalara daýanýan Arkadag şäheriniň mümkinçilikleri görkeziler. Ýakynda Arkadag şäherinde geçirilen maslahatda türkmen halkynyň Milli Lideriniň nygtaýşy ýaly, türkmen wekiliýeti Arkadag şäheriniň özboluşly üstünliklerini we ajaýyplygyny görkezmek üçin zerur işleri etmeli. Bütindünýä sergisine gatnaşylmagy tejribe alyşmaga we Türkmenistanda öňdebaryjy tehnologiki ösüşleri ornaşdyrmaga mümkinçilik berer.
World Smart City Expo şäher innowasiýalary babatda dünýäniň iň uly we iň täsirli çäredir, tutuş dünýäden akylly şäherleriniň liderlerini birleşdirýän tehnologiýalary alyşmak meýdançasydyr. WSCE-niň işewürlik maksatnamasy innowasion tehnologiýa kompaniýalary bilen tanyşmaga we sergä gatnaşyjylar bilen degerli duşuşyklary geçirmäge mümkinçilik berýär. Sergä gatnaşýanlara öz kompaniýalary, hyzmatlary we önümleri bilen sergä gelýänleri tanyşdyrmaga mümkinçilik döredilýär. WSCE şäherlere we sebitlere iň täze, bazara çykmaga taýýar şäher çözgütlerini durmuşa geçirmek arkaly durmuş üçin has amatly ýerler bolmaga kömek edýär.
«Smart City Expo» her ýyl dürli pudak ýolbaşçylaryny, döwlet işgärlerini, ylmy barlagçylary we telekeçileri ýygnaýar, hemmeler üçin has gowy durmuş şertlerini üpjün etmek üçin ählumumy ekoulgamynda kuwwatly gatnaşyklary höweslendirýär. Şu ýyl WSCE-niň işine 25000-e golaý şäher gurluşygynyň dürli pudaklarynda işleýän kärine ussat hünärmenleriň we öňdebaryjy çözgütleri görkezýän kompaniýalaryň we hökümetleriň 1100-den gowrak wekiliniň gelmegine garaşylýar.
