«Ýaş tebigatçy» jemgyýetçilik guramasy we Türkmenistanyň Daşky gurşawy goramak ministrliginiň ýanyndaky Ozon merkezi «Ozon gatlagyny saklap galmak üçin näme edip bilerin?» atly temadan çagalaryň döredijilik işleriniň we usulyýet işleriniň bäsleşigine gatnaşmaga çagyrýar.

Çäräniň maksady – ekologiýa baradaky maglumatlary ýaýratmak we Türkmenistanyň bilim berýän edaralarynyň okuwçylarynyň ozon gatlagyny we Zeminiň howasyny goramak meselesinde habardarlylygyny ýokarlandyrmakdyr.

Bäsleşige 7–18 ýaş aralygyndaky (1–12-nji synplar) Türkmenistanyň umumy we goşmaça bilim berýän edaralarynda okaýan, ekologiýa meselelerine, hususan-da, ozon gatlagyny gorap saklamak meselesine we Zeminiň howasyna antropogen täsire gyzyklanma bildirýän okuwçylar bolup biler.

Bäsleşige gatnaşmak üçin şahsy işler 2024-nji ýylyň 20-nji sentýabryna çenli kabul ediler. Kesgitlenen talaplara laýyklykda taýýarlanan işler «Ýaş tebigatçy» jemgyýetçilik guramasynyň edarasyna iberilýär. Maglumat almak üçin telefonlar: +993 (64) 26 84 32; 94-03-26.

Bäsleşigiň netijelerini jemlemek we ýeňijileri sylaglamak 2024-nji ýylyň 25-nji sentýabryna meýilleşdirilýär.