Ýewropa Bileleşiginiň Merkezi Aziýa boýunça ýörite wekili Teri Hakala oktýabr aýynyň başynda Türkmenistana eden saparynyň çäginde Hazarüsti ulag geçelgesiniň sazlaýjy ýerligini işe girizmek üçin ýokary derejeli çärä gatnaşdy, şeýle hem ÝB bilen Türkmenistanyň arasyndaky hyzmatdaşlygy pugtalandyrmaga we adamlaryň arasyndaky gatnaşygy, adam hukuklaryny, suw baýlyklaryny durnukly dolandyryş ýaly, sebitde ileri tutulýan umumy ugurlary durmuşa geçirmäge bagyşlanan birnäçe duşuşyk geçirdi.
Türkmenistanda Adam hukuklary boýunça ygtyýarly wekil – Adalatçy Ýazdursun Gurbannazarowa bilen duşuşygyň maksady Türkmenistan bilen Ýewropa Bileleşiginiň arasynda adam hukuklaryny goramak, hususan-da, Adalatçynyň zenanlaryň we çagalaryň hukuklaryny goramak işini we mümkinçiligini mundan beýläk-de ösdürmek meselesini ara alyp maslahatlaşmakdy. Duşuşykda taraplar adam hukuklaryny goramakda toplanan oňyn tejribäniň ähmiýetini bellediler we Adalatçynyň diwanynyň garaşsyz edara hökmünde ýurtda adam hukuklaryny öňe sürmekde bitirýän işleriniň ähmiýetine ünsi çekdiler.
Şeýle hem Türkmenistanyň Adalatçysynyň diwanynyň edarawi mümkinçiliklerini artdyrmak we milli adam hukuklaryny goraýjy guramalaryň Bütindünýä bileleşiginde hasaba alynmasy üçin görülýän çäreler ara alnyp maslahatlaşyldy. Türkmenistanda Adam hukuklary boýunça ygtyýarly wekil – Adalatçy Ý.Gurbannazarowa Türkmenistan bilen ÝB arasynda adam hukuklary babatynda hyzmatdaşlygyň çalt depginde ösýändigini belläp, her ýyl adam hukuklary boýunça geçirilýän «Ýewropa Bileleşigi – Türkmenistan» gepleşiklerini mysal getirdi.
Şu ýylyň iýun aýynda Türkmenistanda adam hukuklary boýunça hukuklandyrylan şahsyň gatnaşmagynda geçen adam hukuklary boýunça 16-njy ýyllyk gepleşiklerde ÝB Adalatçynyň diwanynyň adam hukuklaryny goraýan milli guramalaryň Bütindünýä bileleşiginden ygtyýar almak üçin edýän tagallalaryny, şeýle hem Adalatçynyň zenanlar, çaga hukuklary we telekeçilik baradaky mandatynyň güýçlendirilmegini gutlady. Duşuşygyň ahyrynda taraplar adam hukuklary babatynda netijeli hyzmatdaşlygy has-da berkitmäge taýýardyklaryny mälim etdiler.
