Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow ýurdumyza iş sapary bilen gelen Eýran Yslam Respublikasynyň Prezidenti Masud Pezeşkian bilen duşuşdy.
Gahryman Arkadagymyz goňşy ýurduň Baştutanyny mähirli mübärekläp, Magtymguly Pyragynyň doglan gününiň 300 ýyllygy mynasybetli geçirilen halkara foruma gatnaşmaga ýurdumyza sapar bilen gelendigi üçin minnetdarlyk bildirdi. Bellenilişi ýaly, iki goňşy ýurduň arasyndaky hyzmatdaşlyk ähli ugurlarda bolşy ýaly, ynsanperwer ulgamda hem üstünlikli ösdürilýär. Beýik akyldar şahyryň edebi mirasynyň türkmen we eýran halklarynyň arasyndaky gatnaşyklarda möhüm orun eýeleýändigi hem munuň aýdyň güwäsidir. Milli Liderimiz M.Pezeşkiany Eýranyň Prezidenti wezipesine saýlanylmagy bilen ýene-de bir gezek mähirli gutlady hem-de goňşy ýurduň täze saýlanan Prezidenti hökmünde onuň Türkmenistana ilkinji sapary amala aşyrýandygyny belläp, ýokary döwlet wezipesinde uly üstünlikleri arzuw etdi.
Doganlyk ýurduň Baştutany halkara forumyň ýokary guramaçylyk derejesine ünsi çekip, bildirilen myhmansöýerlik üçin hoşallygyny beýan etdi hem-de Gündogaryň akyldar şahyry Magtymguly Pyragynyň umumadamzat ähmiýetli goşgularynyň häzirki döwürde-de uly ähmiýetini saklap galýandygyny aýtdy. Prezident Masud Pezeşkian pursatdan peýdalanyp, Gahryman Arkadagymyza EYR-nyň Beýik ruhy lideri Aýatolla Seýed Ali Hoseýni Hameneýiniň mähirli salamyny ýetirdi. Türkmenistanyň Halk Maslahatynyň Başlygy hoşniýetli sözler üçin minnetdarlyk bildirip, Eýranyň Beýik ruhy liderine iň gowy arzuwlaryny beýan etdi.
Duşuşygyň dowamynda häzirki döwürde işjeň ösdürilýän döwletara gatnaşyklaryň ýokary derejesi kanagatlanma bilen bellenildi. Şol gatnaşyklar dost-doganlyk, hoşniýetli goňşuçylyk, birek-birege hormat goýmak ýörelgelerine esaslanýar. Uzak möhletli geljege niýetlenen ikitaraplaýyn hyzmatdaşlyk esasy ulgamlary öz içine alýar hem-de iki ýurduň milli bähbitlerine doly laýyk gelýär. Asyrlaryň jümmüşinden gözbaş alýan türkmen-eýran gatnaşyklary häzirki döwürde täze many-mazmun bilen baýlaşdyrylýar. Munuň özi dostlukly döwletleriň öňden gelýän hoşniýetli goňşuçylyk gatnaşyklary, hyzmatdaşlygyň kuwwatynyň berkeýändigi bilen şertlendirilendir. Energetika, ulag-kommunikasiýa ulgamlarynda gatnaşyklary pugtalandyrmak üçin bar bolan ägirt uly mümkinçilikler Türkmenistan bilen Eýran Yslam Respublikasynyň hyzmatdaşlygynyň tutuş sebitde netijeli söwda-ykdysady gatnaşyklary çuňlaşdyrmak üçin strategik ähmiýete eýedigini görkezýär. Şunuň bilen birlikde, medeni-ynsanperwer gatnaşyklaryň hem üstünlikli ösdürilýändigini bellemek gerek. Soňky ýyllarda işjeň medeni we ylmy alyşmalaryň ýola goýulmagy, türkmen hem eýran wekiliýetleriniň gatnaşmagynda halkara maslahatlaryň, forumlaryň geçirilmegi, özara Medeniýet günleriniň, amaly-haşam sungatynyň sergileriniň, beýleki bilelikdäki çäreleriň guralmagy munuň aýdyň mysalydyr.
Sebit we ählumumy gün tertibiniň ençeme meseleleri boýunça iki ýurduň garaýyşlarynyň ýakyndygy Türkmenistan bilen Eýranyň abraýly halkara guramalaryň çäklerinde-de netijeli hyzmatdaşlyk etmegini şertlendirýär. Şeýle hem söhbetdeşler özara gatnaşyklaryň häzirki ýagdaýy, ony mundan beýläk-de pugtalandyrmagyň geljekki mümkinçilikleri barada pikir alyşdylar.
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow hem-de Eýran Yslam Respublikasynyň Prezidenti Masud Pezeşkian birek-birege berk jan saglyk, abadançylyk, alyp barýan döwlet işlerinde mundan beýläk-de üstünlikleri arzuw etdiler.
