Daşoguz welaýatynyň Şawat etrabynyň daýhanlary gyş sarymsak ekişini üstünlikli tamamladylar. Bu ekin üçin ýerler ähli daýhan birleşiklerinde deň paýlandy. Etrapda 100 gektar ýere sarymsak ekildi. Boldumsaz, Akdepe we S.Türkmenbaşy etraplary sebitde esasy sarymsak öndürýänlerdir, onuň aglaba bölegi «Gökçäge» daýhan birleşiginde ýetişdirilýär.

Ýurdumyzyň demirgazyk sebitinde sarymsak şu ýylyň güýzünde 780 gektar meýdanda ekildi. Ekerançylar her gektaryndan azyndan 80 sentner hasyl ýygnamagy we 6240 tonna gymmatly önüm taýýarlamagy meýilleşdirýärler. Sarymsak ekmäge niýetlenen meýdanlaryň düz tekizlenmegine we Gün şöhlesiniň elýeterli bolmagy göz öňünde tutulypdyr, sebäbi ol ýylylygy halaýan ekin. Tohumyň görnüşleri saýlanyp alynanda ýerli toprak-howa şertleri göz öňünde tutulandyr.

Ýurdumyzyň azyk howpsuzlygyny pugtalandyrmak we ilaty tutuş ýylyň dowamynda zerur gök önümler bilen üpjün etmek boýunça obasenagat toplumynyň öňünde goýlan wezipe laýyklykda Daşoguz welaýatynyň daýhanlary gök ekinleriň gowy hilli görnüşlerini önümçilige ornaşdyrmaga we olary ösdürip ýetişdirmegiň ylmy taýdan esaslandyrylan usullaryndan ýerlikli peýdalanýarlar.