Türkmen manadynyň dolanyşyga  girizilmeginiň 31 ýyllygy, şeýle hem beýik akyldar şahyr Magtymguly Pyragynyň doglan gününiň 300 ýyllygy mynasybetli «Gül Zaman» toý mekanynda  «Milli ykdysadyýetimiziň häzirki zaman özgertmeleri» at bilen bank işgärleriniň bäsleşigi geçirildi.

Çärä Türkmenistanyň bank ulgamynyň wekilleri ýygnandy, ol  diňe bir baýram bolman, eýsem, oňa gatnaşyjylaryň ussatlygyny we çuňňur bilimlerini, şeýle hem olaryň milli ykdysadyýetiň ösüşine ygrarlylygyny görkezdi.

Bäsleşik Türkmenistanyň taryhy senelerini we gazananlaryny dabaraly gutlamak, özgertmeleri şöhlelendirmek we bank pudagynda işgärleriň hünär derejesini ýokarlandyrmak maksady bilen geçirildi. Hormatly Prezidentimiziň milli ykdysadyýeti hemmetaraplaýyn ösdürmäge gönükdirilen syýasaty giň möçberli ykdysady özgertmeleri amala aşyrmaga esas boldy, bäsleşik hem bank ulgamynyň işgärleriniň hünärleriniň we ukyp-başarnyklarynyň ösmegine ýardam etdi.

Bäsleşik iki tapgyrda geçirildi: birinji tapgyra Türkmenistanyň ähli sebitlerinden, şol sanda Arkadag şäherinden bank işgärleri gatnaşdylar, ikinji tapgyrda bolsa Aşgabatda ýerleşýän banklaryň merkezi edaralarynyň işgärleri bäsleşdi. Oňa gatnaşanlara dogry baha berilmegini üpjün etmek üçin emin agzalarynyň hatarynda  tejribeli hünärmenler, döwlet täjirçilik banklarynyň wekilleri hem-de ykdysadyýet, maliýe we bank pudagy babatda çuňňur bilimleri bolan Türkmen döwlet ykdysadyýet we dolandyryş institutynyň wekilleri bardy.

Bäsleşige gatnaşyjylara milli ykdysadyýetde amala aşyrylýan wajyp özgertmeler, kadalaşdyryjy kanunlaryň ulanylyşy we bank pudagynda täze üstünlikler bilen baglanyşykly sowallar berildi. Iň gowy netije we ykdysady ösüşiň wezipelerine düşünjesini görkezen gatnaşyjylar sylaglandy.

Welaýatlardan we Arkadag şäherinden bank işgärleriniň arasynda:

«Halkbankyň» Ak bugdaý etrap şahamçasynyň topary 1-nji orna mynasyp boldy.  

  2-nji orny Arkadag şäheriniň merkezi banky eýeledi.

  «Senagat» bankyň Balkan welaýat bölümi 3-nji orna düşdi.

Aşgabadyň merkezi banklarynyň işgärleriniň arasynda:

  1-nji orny Türkmen-Türk paýdarlar-täjirçilik banky eýeledi.

   2-nji orna «Türkmenistan» döwlet täjirçilik banky mynasyp boldy.

   3-nji orna Türkmenistanyň Merkezi banky düşdi.

Ýeňijiler Hormat hatlary we gymmat bahaly sowgatlar bilen sylaglanyldy. Birinji orny eýelän topara şahadatnama,  gymmat bahaly sowgatlar  we şu ýylyň nyşany bolan Magtymguly Pyragynyň  suraty ýerleşdirilen sagat gowşuryldy. Ikinji we üçünji orna mynasyp bolanlara hem şahadatnamalar we gymmatly sowgatlar berildi