Maýa Kulyýewa adyndaky Türkmen milli konserwatoriýasynyň Uly zalynda professor, Türkmenistanyň halk artisti Atageldi Garýagdyýewiň ýurdumyzyň hemişelik Bitaraplygynyň 29 ýyllygyna bagyşlanan konserti boldy.

Wokal professory ýa-da «Altyn bariton» adyna mynasyp bolan artist tomaşaçylaryň öňünde ajaýyp çykyş etdi. Konsertde Mosartyň, Werdiniň, Rossininiň, Çaýkowskiniň, Bizäniň we beýleki meşhur kompozitorlaryň meşhur operalaryndan ariýalar ýaňlandy, her gezek hem Atageldi Garýagdyýew täze gahrymanyň keşbini ussatlarça döretmegi başardy. Ol bir görseň ýeňles Don Žuan, ýa-da toba eden Ýewgeniý Onegin bolýardy. Zaldaky talyp-aýdymçylar üçin ussadyň çykyşy diňe bir konsert däl, eýsem, gahrymanyň keşbini görkezmekde ussatlyk sapagy hem boldy.

Bizeniň «Karmen» operasyndan ariýa hormeýster Haýdar Eminowyň ýolbaşçylygyndaky Türkmen döwlet horunyň aýdymçylary bilen bilelikde ýerine ýetirildi. Atageldi Garýagdyýew dünýä belli nusgawy eserleri ýerine ýetirdi. Daňatar Öwezowyň, Nury Halmämmedowyň, Hydyr Allanurowyň we Daňatar Hydyrowyň eserleri olar bilen gowy sazlaşdy. Aýdymça ýurdumyzyň iň ussat pianinoçylaryndan biri – Türkmenistanyň at gazanan artisti Wladimir Mkrtumow sazandarlyk etdi. Iki ussadyň konserti üstünlik gazandy. 

Tomaşaçylar Wladimir Mkrtumowy Nury Halmämmedowyň «Dutaryň owazy» sazyny fortepianoda ýokary derejede ýerine ýetireni üçin şowhunly el çarpyşmalar bilen hoşallyklaryny bildirdiler. Konsert tamamlansa-da, el çarpýan hoşal tomaşaçylar artistleri uzak wagtlap sahnadan goýbermediler. Soňra konsertden daşgary Daňatar Hydyrowyň «Ýaýla hüwdüsi» eseri ýerine ýetirildi.

Uly zalda geçirilen agşam tomaşaçylaryň aňynda kärine ussatlaryň ajaýyp ýerine ýetiren nusgawy eserleriniň ajaýyp owazlaryny galdyrdy.

Irina Sobolewa, konserwatoriýanyň mugallymy