Ýaş suratkeşleriň halkara bäsleşiginiň jemi boýunça neşir edilen «Türki dünýäsiniň medeni mirasy we Türkmenistan» atly täze katalog-albom Bäşim Nuraly adyndaky çagalar çeperçilik mekdebiniň ýygyndysyna girdi.
Türki halklaryň medeni mirasyny wagyz etmek maksady bilen neşir edilen bu ýygyndyda Azerbaýjandan, Gazagystandan, Gyrgyzystandan, Özbegistandan, Türkiýeden we Türkmenistandan ýaş zehinleriň döredijilik işleri bar.
Ýurdumyzdaky döredijilik mekdepleriniň okuwçylary bu bäsleşige işjeň gatnaşdylar. Şonuň üçin albomyň sahypalarynda Türkmenistandan finala çykanlaryň we ýeňijileriň ýüzden gowrak suraty bar.
Ýurdumyzdan bäsleşikde: Mary welaýatynyň Ýolöten etrabyndaky 29-njy orta mekdebiň 12-nji synp okuwçysy Mähriban Durdymyradowa birinji, Sahy Jepbarow adyndaky Arkadag şäher ýörite sungat mekdebiniň birinji ýyl talyby Gülnabat Annanurowa ikinji we Balkanabat şäherindäki 19-njy orta mekdebiň 11-nji synp okuwçysy Begenç Hojagulyýew üçünji orny eýelediler.
Şeýle hem bu alboma Bäşim Nuraly adyndaky çagalar çeperçilik mekdebiniň zehinli okuwçylarynyň sekiz işi girizilipdir. Aýnur Karowa, Bibi Gurbanowa, Akmuhammet Toýlyýew, Merjengül Hojagulyýewa, Aýjeren Atdaýewa, Gülaýym Kulyýewa, Merýem Annaýewa we Gözel Çaryýewa iň gowy işleriň awtorlarydyr.
Alboma girizilen her iş ýaş zehinleriň özbaşdak garaýşyny görkezip bilýän ýaş suratkeşleriň we mugallymlarynyň işiniň netijesidir. Geçmiş bilen şu günüň arasyndaky çuňňur baglanyşygy, şeýle hem Türkmenistanyň däp-dessurlaryny we döwrebaplygyny görkezýän bu suratlar däp bolan we häzirki zaman sungatyny öwrenmek netijesinde döredildi.
Ýaş suratkeşleriň özboluşly eserleri türki halklaryň medeniýetiniň baýlygyny we köpdürlüligini görkezýän çäksiz döredijiligiň umumy keşbiniň möhüm bölegidir. Şu jähtden ýaş suratkeşleriň 2024-nji ýylda Änew şäheriniň «Türki dünýäsiniň medeni paýtagty» diýlip yglan edilmeginiň çäklerinde Türki medeniýetiň halkara guramasynyň (TÜRKSOÝ) Türkmenistanyň Medeniýet ministrligi bilen bilelikde geçiren bäsleşigi halklaryň arasyndaky medeni gatnaşyklary berkitmekde möhüm ädim boldy.
Bu çärä bagyşlanan täze katalog-albomyň çykarylmagy dürli medeni ýörelgeleriň arasynda özara düşünişmäge we pikir alyşmaga ýardam edýär, şeýle hem türki ýurtlaryň ýaşlarynyň arasynda täze medeni gatnaşyklary kemala getirýär.
