2024-nji ýylyň 22-nji noýabrynda London şäherinde Türkmenistanyň Beýik Britaniýadaky Ilçihanasynyň binasynda Gündogaryň akyldary we şahyry Magtymguly Pyragynyň doglan gününiň 300 ýyllygy we 2024-nji ýylyň «Pähim-paýhas ummany Magtymguly Pyragy» ýyly diýlip atlandyrylmagy mynasybetli döredijilik agşamy geçirildi. Bu barada Türkmenistanyň DIM-niň web-saýtynda habar berilýär. 

Çäräni Türkmenistanyň Beýik Britaniýadaky Ilçihanasy Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar instituty bilen bilelikde gurady.

Döredijilik agşamyna Türkmenistanyň wekiliýetiniň agzalary, Dünýä türkmenleriniň ynsanperwer birleşiginiň Beýik Britaniýadaky «Galkynyş» bölüminiň wekilleri, ýurduň ýokary okuw mekdeplerinde bilim alýan türkmen talyplary, şeýle hem London şäherinde ýaşaýan Türkmenistanyň raýatlary gatnaşdylar.

Çäräniň dowamynda Türkmenistanyň Beýik Britaniýadaky Ilçisi Ý.Serýaýew, şeýle hem Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň ylmy işgärleri A.Nuraýew we G.Çangliýew çykyş etdiler. Çykyşlarda Magtymguly Pyragynyň doglan gününiň 300 ýyllygy mynasybetli halkara derejesinde geçirilýän dabaraly çäreler barada maglumat berildi.

Beýik türkmen şahyrynyň we akyldarynyň döredijiliginiň halkara derejesindäki aýratyn orny nygtaldy. Çykyşlarda Magtymguly Pyragynyň dünýä medeniýetiniň genji-hazynasyna goşan uly goşandy, şahyryň ömrüni we döredijiligini öwrenmek bilen bagly geçirilýän ylmy işlere esaslanmak arkaly, onuň irki eserleri we terjimehaly barada gürrüň berildi.

Çäräniň barşynda Magtymguly Pyragynyň döredijiligine we Türkmenistanyň ösüşlerine bagyşlanan wideofilm görkezildi, şeýle hem türkmen şahyrynyň iňlis diline terjime edilen eserleriniň sergisi guraldy.