Maýa Kulyýewa adyndaky Türkmen milli konserwatoriýasynyň Uly zalynda Daňatar Öwezow adyndaky Türkmen döwlet ýörite sazçylyk mekdebiniň wekilleri tanymal türkmen kompozitory Rejep Rejebowyň doglan gününiň 80 ýyllygyna bagyşlanan ýadygärlik konsert guradylar.
Türkmenistanyň halk artisti, Türkmenistanyň Magtymguly adyndaky döwlet baýragynyň eýesi, Türkmenistanyň we SSSR kompozitorlar bileleşiginiň agzasy, şeýle hem SSSR kinematografiýaçylar birleşiginiň agzasy Rejep Rejebow ýurdumyzyň medeni mirasyny has baýlaşdyran köp filmlere saz eserlerini ýazan ajaýyp kompozitor hökmünde milli saz sungatynyň taryhyna girdi.
Onuň kärdeşleri, talyplar we sazandalar görnükli kompozitoryň ýagty ýadygärligini hatyralamak üçin ýygnandylar. Konsertde Rejep Rejebowyň dürli ýyllarda ýazan meşhur eserleri ýaňlandy.
Ýatlama agşamy Rejepmyrat Kakamyradowyň we horuň ýerine ýetirmeginde «Türkmenistan» eseri bilen açyldy. Soňra aýdymçy Ogulgerek Pirnýaýewa simfoniki orkestr bilen bilelikde «Säher atçaparlary» filmine kompozitoryň döreden Uzukjemalyň «Armanym» aýdymyny ýerine ýetirdi.
Konsertde «Galkynyş» simfoniki orkestri üçin «Desantçylar» filminden kompozisiýa ýerine ýetirildi. «Saz taryhy we saz nazaryýeti» bölüminiň talyby Yhlas Artykow halypasynyň hatyrasyna «Rejep Rejebowa bagyşlama» saz kompozisiýasyny hödürledi.
Agşamyň ahyrynda Söhbet Maksatmyradow «Görogly» operasyndan «Röwşeniň aýdymyny» we Rejepmyrat Kakamyradow «Daş galdy» wokal eserlerini ýerine ýetirdiler. Şeýle hem tomaşaçylar halk orkestriniň sazandarlygynda Bägül Hudaýberenowa bilen Yhlas Welihanowyň ýerine ýetiren «Söýgi aýdymyndan» lezzet aldylar.
Eserleri halk orkestri üçin Daňatar Öwezow adyndaky Türkmen döwlet ýörite sazçylyk mekdebiniň mugallymy Gadam Jumagulyýew gaýtadan işläpdir.
Aýdym-saz bileleşiginiň wekilleriniň belleýşi ýaly, Rejep Rejebowyň sazlary diňleýjileriň ýüregine ýol salýar, olar hemişe kompozitor we onuň döredijilik mirasy barada ýatdan çykmajak ýatlamalara sebäp bolar.
Rejep Rejebowyň hatyrasyna şanly çäreleriň birnäçesi geçirildi. Olaryň arasynda onuň eserleriniň konserti, Maýa Kulyýewa adyndaky Türkmen milli konserwatoriýasynda sungat işgärleri bilen döredijilik duşuşygy, şeýle hem Türkmenistanyň Döwlet medeniýet merkeziniň Mukamlar köşgünde konsert bar.
