Türkmenistanda geljegi uly ösüş ugurlaryny kesgitlemäge we dünýäni üýtgetmäge ukyply güýçli innowasiýa çeşmesi hökmünde başlangyç işleriniň ösdürilmegine uly üns berilýär.
Başlangyçlaryň milli ekologik ulgamyny döretmek üçin halkara hyzmatdaşlyk ýola goýulýar we bu ugurda öňdebaryjy tejribe öwrenilýär. Şu maksat bilen Türkmenistanyň Magtymguly adyndaky Ýaşlar guramasynyň Merkezi Geňeşiniň, Ylymlar akademiýasynyň Halkara ylmy-tehnologik parkynyň, Saglygy goraýyş we derman senagaty ministrliginiň, Myrat Garryýew adyndaky Türkmenistanyň Döwlet lukmançylyk uniwersitetiniň, Oguz han adyndaky Inžener-tehnologik uniwersitetiniň işgärlerinden ybarat wekiliýeti 11-12-nji dekabrda Stambulda geçen «Take Off Startup Sammit 2024» atly giň gerimli başlangyç sammitine gatnaşdy. Türk Tehnologiýa topary gaznasy tarapyndan ýola goýlan bu çärä çakylyk Yslam hyzmatdaşlygynyň Ýaşlar forumyndan –Yslam Hyzmatdaşlygy Guramasyna (YHG) agza ýurtlaryň öňdebaryjy ýaşlar guramalaryny birleşdirýän halkara, telekeçilik däl guramadan we tutuş yslam dünýäsinden geldi.
Başlangyç sammiti Yslam Hyzmatdaşlyk Guramasy ýurtlaryna tehnologiýa öňdebaryjylary bilen duşuşmaga, öz işlerini öňdebaryjy maýa goýumçylara görkezmäge, bilermenler bilen aragatnaşyk saklamaga we başlangyçlaryny halkara derejesine götermäge mümkinçilik berýär. Onuň maksady başlangyçlary ösdürmek we olaryň bäsdeşlige ukyplylygyny ýokarlandyrmak üçin sebitiň telekeçilik ekologiýa sistemasyna täsir etmek hem halkara hyzmatdaşlygyň esasyny goýmakdyr. Bu başlangyçlar çäreler, maslahatlar we özara işleşmek arkaly üstünlik gazanmak üçin görnetinligi we çeşmeleri gazanmaga kömek edýän meýdançadyr.
Bu ýylky çäre innowasiýa önümleri we hyzmatlary bolan başlaýjylara geljegi kesgitleýän pikirlerini hödürlemäge mümkinçilik berer. 2024-nji ýyldaky başlangyç sammitiniň esasy mowzuklary emeli aň, bloklama, durnukly energetika we sanly saglygy goraýyş ýaly ugurlardaky tehnologiýalar bilen baglanyşyklydyr. «Take Off Istanbul» çäresinde görkezilen iň innowasion we hyjuwly başlaýjylar maýa goýumy/grant gazanmaga mümkinçilik alýarlar.
«Take Off Istanbul» çäresi 2018-nji ýyldan bäri geçirilýär we telekeçileri, maýadarlary, tälimçileri hem başlangyç ekologik ulgam işjeňlerini birleşdirýär.
