12-nji dekabrda Moskwada Garaşsyz Döwletleriň Arkalaşygynyň hökümet baştutanlarynyň geňeşiniň mejlisi bolup geçdi. Oňa Türkmenistanyň Belarus Respublikasyndaky Adatdan daşary we Doly ygtyýarly ilçisi, Türkmenistanyň GDA-nyň kanuny we beýleki edaralaryndaky hemişelik doly ygtyýarly wekili Nazarguly Şagulyýew gatnaşdy.

Duşuşygyň netijesi boýunça birnäçe resminama, şol sanda GDA agza ýurtlaryň 2025-2026-njy ýyllar üçin ynsanperwer hyzmatdaşlygy ugrunda ileri tutulýan çäreler meýilnamasyna-da gol çekildi.

GDA-nyň Ýerine ýetiriji komitetiniň metbugat gullugynyň habaryna görä, meýilnama bilim, ylym, medeniýet, maglumat we köpçülikleýin aragatnaşyk, kitap neşiri, kitap ýaýratma we çap işi, sport we sagdyn durmuş ýörelgesi, syýahatçylyk, ýaşlar bilen işleşmek ýaly ugurlarda köptaraplaýyn hyzmatdaşlygy sazlaşykly alyp barmak we ösdürmek üçin niýetlenendir.

Resminama Azerbaýjan, Ermenistan, Belarus, Gazagystan, Gyrgyzystan, Russiýa, Täjigistan, Türkmenistan, IPA GDA Geňeşiniň sekretariaty, Bilim pudagyndaky hyzmatdaşlyk geňeşiniň, düýpli ylym pudagynda hyzmatdaşlyk boýunça geňeşiň, döwürleýin neşirler, kitap neşiri, kitap ýaýratmak we çap etmek pudagyndaky döwletara geňeşiň we Ynsanperwer hyzmatdaşlyk boýunça döwletara gaznasynyň teklipleri esasynda taýýarlandy. Meýilnamanyň 10 bölüminde 200-den gowrak çäre bar.