Täze ýyl baýramynyň öňüsyrasynda Türkmenistanyň sungatda at gazanan işgäri Resul Gylyjowyň ýolbaşçylygyndaky Türkmenistanyň Döwlet simfoniki orkestriniň Türkmenistanyň Döwlet medeniýet merkeziniň Mukamlar köşgüniň sahnasyndaky konserti üstünlikli geçdi. Konsert birnäçe nesliň çagalarynyň halaýan gahrymany – jadygöý oglanjyk Garri Potteriň hyýaly başdan geçirmeleri bilen başlandy. 

Jon Uillýamsyň syrly, käte dabaraly sazy «Garri Potter we filosofiýa daşy» kinofilmindäki jadygöýlik mekdebinde okaýan gahrymanlaryň hereketlerini psihologiki taýdan görkezýärdi. Ekrandaky kinofilmden bölekler we simfoniki orkestriň çykyşyny tomaşaçylar bütewi bir zat ýaly kabul etdiler. 

Aýdymçylaryň çykyşlary zalda baýramçylyk ruhuny döretdi, olaryň her biri tomaşaçylara tüýs ýürekden gutlaglar we iň gowy arzuwlar bilen ýüzlendi. Aýratynam, Döwran Şammyýewiň köpçülige ýüzlenip: «Täze ýyl — bu geçmişiň we geljegiň baglanyşýan wagtynyň tansydyr» - diýmegi has täsirli boldy.

Aýdymçylar Täze ýyl aýdymyna sazlaşykly goşulan geçen döwrüň meşhur aýdymlaryny ajaýyp ussatlarça aýdyp, tomaşaçylary begendirdiler. Bahar Durdyýewa «Kiçijik şazada» aýdymyny ýürekden ýerine ýetirdi. Mansur Şaripowyň «Gyş külbede ýaşaýardy» aýdymyny haýran galdyryjy aýtmagy zalda şowhunly el çarpyşmalara getirdi. Göze gelişli Şasenem Guwerne Şarl Aznawuryň aýdymlary fransuz dilinde köpçülige hödürledi. Maýsa Nyýazowanyň çykyşy hem täsirli boldy – ol isle romantiki, ýa-da, liriki bolsun, islendik aýdymyň soňuny «jaz äheňi» bilen tamamlaýardy. 

Täze ýyl konsertinde «Öýde bir özi», «Karnawal», «Ykbal kinesi ýa-da dostlar hammamda» we beýleki kinofilmlerinden sazlardyr aýdymlar ýaňlandy.

Konsert Leroý Andersonyň «Top-hlop-hey!» atly özboluşly interaktiw eseri bilen tamamlandy, oňa tomaşaçylar hem goşuldylar. Oňa Resul Gylyjow ýolbaşçylyk etdi.

2025-nji ýylda döredijilik duşuşyklary arzuwlary bilen Täze ýyl konserti tamamlandy. Tomaşaçylar zaldan çykýardylar, ýöne olaryň has batyrgaýlary halan ýerine ýetirijileri bilen ýadygärlik surata düşmek üçin sahna çykýardylar.