2025-nji ýylda Türkmenistanyň hemişelik Bitaraplygynyň 30 ýyllygynyň baýramynyň çäklerinde «Yutong ZK6128HG» kysymly döwrebaplaşdyrylan şäheriçi awtobuslaryny satyn almak meýilleşdirilýär. Degişli Karara ýurdumyzyň Prezidenti ýakynda Ministrler Kabinetiniň mejlisinde gol çekdi.
Şeýlelik bilen, Ministrler Kabinetiniň ýanyndaky Ulag we kommunikasiýalar agentliginiň «Türkmenawtoulaglary» agentligine döwrebap ulaglaryň 700-sini satyn almak üçin Hytaý Halk Respublikasynyň «Yutong Bus Сo., Ltd.» kompaniýasy bilen şertnama baglaşmaga rugsat berilýär.
Türkmenistanyň awtoparkynda şäher üçin hem-de şäherara ugurlary üçin «Toyota», «Hyundai Universe Luxury», «Hyundai Universe Noble», «Hyundai Super Aero City», «Yutong ZK6129H» we beýleki dürli kysymly ulaglaryň ulanylýandygyny bellemek gerek. Awtoparkynyň häzirkizaman ulaglary bilen yzygiderli täzelenmegi täze ugurlaryň ösmegine we innowasiýa tehnologiýalarynyň ornaşdyrylmagyna ýardam edýär.
«Yutong» awtobuslarynyň rahatlygy, tygşytlylygy we howpsuzlygy utgaşýar, şeýle hem halkara ekologiýa ölçeglerine laýyk gelýär. Ulag öndüriji kompaniýa täze energiýa çeşmelerinde işleýän ulaglary işjeň işläp taýýarlaýar we öndürýär.
Gahryman Arkadagymyzyň başlangyjy bilen gurlan Arkadag «akylly» şäherinde «Yutong ZK6128BEVG» kysymly we «Anhui Jianghuai Automobile Group Corp., Ltd.» kompaniýasyndan «JAC E-J7» kysymly elektrik ulaglary şäheriň ýaşaýjylaryna we myhmanlaryna ýokary hilli hyzmat edýär.
Häzirki wagtda «Türkmenistany 2022 – 2028-nji we 2022 – 2052-nji ýyllarda durmuş-ykdysady taýdan ösdürmegiň Milli maksatnamalaryna» laýyklykda amala aşyrylýan ulag düzümlerini döwrebaplaşdyrmaga gönükdirilen öndürijilikli özgertmeleri işjeň amala aşyrylýar. Maksatnamalaryň esasy maksatlary — ýolagçylara hyzmatyň hilini ýokarlandyrmak we hödürlenýän hyzmatlaryň gerimini giňeltmekdir.
Arkadag şäherine iş saparynda Türkmenistanyň Halk Maslahatynyň Başlygy Gurbanguly Berdimuhamedow Gökdepe şaýolunyň ugrundaky köp zolakly köpriniň taslamasy bilen tanyşdy. Taslamanyň möhümdigini belläp, Gahryman Arkadagymyz bu möhüm sebitde ulag üçin amatly şertleri döretmek barada görkezmeler berdi.
