Hormatly Prezidentimiziň ýurdumyzyň oba hojalygynyň ekerançylyk pudagyny sebitleriň toprak-howa şertlerine baglylykda öňdebaryjy tehnologiýalar esasynda alyp barmak baradaky paýhasly çözgüdinden ruhlanan Balkan welaýatynyň Magtymguly etrabynyň daýhanlary, ýer eýeleridir mülkdarlary gaýratly zähmet çekýärler.
Olar jennetiň bir künjegini ýa-da salýan gözel Sumbar, Çendir jülgelerinde miweli baglary, gök önümleri, ýeralmany, kelemi, käşiri, sogany ösdürip ýetişdirmekde hem-de olardan bol we ýokary hasyl almakda ýylyň-ýylyna guwandyryjy netijeleri gazanýarlar.
Halkara parahatçylyk we ynanyşmak ýylynda hem magtymgululy hasyl ussatlary Berkarar döwletiň täze eýýamynyň Galkynyşy döwrüniň ruhuna mynasyp işleri bitirýärler. Hemişelik Bitaraplygymyzyň 30 ýyllyk şanly baýramynyň dabaraly belleniljek üstümizdäki ýylynda etrap boýunça ýeralma, kelem, käşir, sogan, gök-miwe önümlerini öndürip, halkymyzyň bereketli saçaklaryna ýetirmek maksat edinilýär.
Etrapda şu ýyl hyýar, pomidor ýaly gök önümleri ösdürip ýetişdirmek esasan hususy ýer eýeleridir mülkdarlara ynanylypdyr. Bu babatda hormatly Prezidentimiziň döwlet derejesinde yzygiderli berýän hemaýatlarydyr goldawlaryndan göwünleri galkynan etrabyň mülkdarlary Sumbar, Çendir jülgelerinde gurnan ýyladyşhanalaryndan şu günler pomidoryň, hyýaryň ýokary hilli we bol hasylyny ýygnap, terligi bilen welaýatyň etrap-şäherleriniň sarp edijilerine ugradýarlar.
Türkmenistanyň Senagatçylar we telekeçiler birleşmesiniň agzasy Baýramdurdy Goçakowyň etrabyň Parhaý jülgesiniň ugrundaky bir gektar meýdanda guran ýyladyşhanasy hem sözüň doly manysynda nusgalyk önümçilikdir. Mundan 10 ýyla golaý wagt ozal ulanylmaga berlen ýyladyşhananyň esasy bölegini häzir pomidor önümçiligi eýeleýär. Ösen tehnologiýalar, innowasion usullar arkaly dolandyrylýan önümçilikde pomidoryň nahallaryny iýmitlendirmek, howa çalşygy bilen üpjün etmek ýaly birnäçe işlerem awtomatlaşdyrylan görnüşde amala aşyrylýar. Şeýlelikde, ýylylyk, çyglylyk, suwaryş ulgamlaryna hünärmenler tarapyndan kompýuterleriň üsti bilen gözegçilik edilýär. Bu ýerde häzire çenli 36 tonna pomidor taýýarlanylyp, içerki we daşarky sarp edijilere ugradyldy.
Şu günlerde hem uly işleri alyp barýan Magtymguly etrabynyň telekeçileri has-da öndürijilikli, döredijilikli zähmet çekýärler. Olar Halkara parahatçylyk we ynanyşmak ýylynyň her bir iş gününi ýokary önümçilik görkezijilerine besläp, täze sepgitlere tarap buýsançly barýarlar.
