2025-nji ýylyň 21-22-nji ýanwarynda Eýran Yslam Respublikasynyň gümrük gullugynyň wekiliýeti iş sapary bilen Aşgabat şäherinde boldy. Bu sapar 2024-nji ýylyň 28-nji awgustynda gol çekilen Türkmenistanyň we Eýranyň gümrük gullugynyň 2024 – 2026-njy ýyllar üçin bilelikdäki hereket meýilnamasyny durmuşa geçirmäge gönükdirilendir.
Saparyň çäginde taraplaryň iş duşuşygy geçirildi, onuň barşynda iki ýurduň gümrük edaralarynyň arasyndaky hyzmatdaşlygyň netijeleri ara alnyp maslahatlaşyldy.
Taraplar Howdan-Bajgyran barlag nokatlarynda hyzmatdaşlyk meselelerini we gümrük serhetlerinden geçýän ýük akymynyň artmagynyň mümkinçiligini ara alyp maslahatlaşdylar. Bu babatda aýratyn gümrük gözegçiligini guramaga we eksport hem-de üstaşyr daşalýan harytlar bilen baglanyşykly bolup biljek hukuk bozulmalarynyň öňüni almaga aýratyn üns berildi.
Ygtyýarly ykdysady amallar babatynda hyzmatdaşlygy gowulandyrmak, mundan beýläk öňüni almak maksady bilen ýüze çykarylan hukuk bozulmalary barada maglumat alyşmak we iki tarapyň daşary ykdysady işine gatnaşýanlary gümrük düzgünleri bilen tanyşdyrmak üçin bilelikdäki çäreleri geçirmek barada ylalaşyk gazanyldy.
Myhmanlar Türkmenistanda gümrügiň emele geliş taryhy we onuň işleri bilen tanyşdylar we saparlarynyň öňüsyrasynda işe başlan Türkmenistanyň Döwlet gümrük gullugynyň Dolandyryş we seljeriş merkezine baryp gördüler.
Eýranly kärdeşleriň iş sapary Döwlet gümrük gullugynyň Okuw merkezine we halkara gümrük terminalyna baryp görmek bilen tamamlandy.
