Türkmenistanyň Döwlet çeperçilik akademiýasy ýurdumyzyň ýaşajyk raýatlarynyň arasynda «Ak kepderi – parahatçylygyň ilçisi» atly döredijilik sergisini geçirdi. Çäre Türkmenistanyň başlangyjy bilen BMG-niň Baş Assambleýasy tarapyndan 2025-nji ýylyň «Halkara parahatçylyk we ynanyşmak ýyly» diýip yglan edilmegi mynasybetli guraldy.

Akademiýanyň eýwanynda Aşgabat şäherindäki orta mekdepleriň okuwçylaryna 2025-nji ýylyň nyşanyny görkezýän sergi, paýtagtymyza bezeg berýän ýadygärlikleriň nusgalary, döredijilik ýokary okuw mekdebiniň muzeýiniň Altyn gaznasyndan özboluşly heýkelleri ýaýbaňlandyryldy.

Çäre düşündiriş we watanperwerli ähmiýetli boldy. Akademiýanyň hünärmenleri çagalara paýtagtymyzyň köçelerinde her gün duşýan nyşanlarymyz barada maglumatlary düşnükli dilde gürrüň berdiler. Kaşaň ýadygärlikler ýurdumyzyň taryhynyň wajyp wakalaryny beýan edýär, ýurdumyzyň her raýaty, şol sanda çagalar hem ol ýa-da beýleki ýadygärligiň nämä bagyşlanandygyny bilmelidirler.

Çagalar paýtagtymyzyň gözel ýerleri barada gürrüňleri ünsli diňlediler, olaryň köpüsi ýadygärlikleriň nusgalaryny tanadylar we olaryň şäherde ýerleşýän ýerlerini anyk aýtdylar.

«Ak kepderi – parahatçylygyň ilçisi» çäresi Döwlet çeperçilik akademiýasyna gezelenji bilen hem ýurdumyzyň ýaşajyk raýatlarynyň aňynda galar. Ähmet Gurbangeldyýewiň «Parahatçylyk» heýkeltaraş eseri bu çäräniň esasy gymmatlyklarynyň biri boldy. Ak kepderiler bilen oýnap oturan oglanjyk olaryň parahatçylygyň ilçisidigi barada asla pikirem etmeýär. Onuň üçin kepderiler al-asmanda pelpelleýän ýa-da elleridir egnine ynamly gonup bilýän wepaly we owadan dostlary. Akademiýanyň myhmanlary bu ýokary okuw mekdebiniň Altyn gaznasy muzeýine baryp gördüler we gymmatlyklar bilen tanyşdylar. Olar çaga sadalygy bilen «Futbolçylar» we «Aşyk oýny» ýaly heýkeltaraşlyk eserlerine syn etdiler. «Küşt oýnaýan melike» heýkeli gyzjagazlaryň ünsüni özüne çekdi. Dogrusy, «Wepadar maşgala» eseri hemmäniň göwnünden turdy. Heýkeltaraş Selbi Jumadurdyýewa gipsden alabaý itleriniň maşgalasynyň şekilini döredipdir, soňra olara reňk beripdir. Ussat bu alabaý itleriniň maşgalasynyň her bir agzasynyň gözleriniň täsirli bolmagyny başarypdyr. 2023-nji ýylda bu heýkeltaraşlyk eseri Türkmen alabaýynyň baýramy mynasybetli geçirilen bäsleşik sergisinde 1-nji ýeri eýeledi.

Galereýada akademiýa gezelenji dowam etdi. Bu ýerde hünärmenler ýaşajyk myhmanlaryň ünsüni kepderiler agzalýan eserlere gönükdirdiler. Şeýle eserleriň arasynda Laçyn Taganowanyň «Parahatçylygyň ilçileri», Jeýran Umarowanyň «Taslama», Aksoltan Hommadowanyň «Abadançylyk», Rüstem Haýytowyň «Meleguş» we beýlekiler bar.

Çagalar ajaýyp sungat eserleri bilen tanşyp, daş-töweregimizdäki dünýä gözelligine göz ýetirdiler, ýaşyna garamazdan, ýurdumyzyň ähli ýaşaýjysy ony goramalydyr.