4-nji martda Türkmenistanyň Jemgyýetçilik guramalarynyň merkezi binasynda «Ösüşlere beslenen täze döwrüň buýsançly zenanlary» atly dabaraly maslahat geçirildi. Türkmenistanyň Halk Maslahatynyň, Türkmenistanyň Mejlisiniň, Türkmenistanyň syýasy partiýalarynyň, Türkmenistanyň Zenanlar birleşiginiň Merkezi Geňeşiniň we jemgyýetçilik guramalarynyň bilelikde guramagyndaky maslahat Halkara zenanlar güni mynasybetli geçirildi.
Onda Türkmenistanyň Zenanlar birleşiginiň Merkezi Geňeşiniň başlygy, Türkmenistanyň Kärdeşler arkalaşyklarynyň Milli merkeziniň başlygy Oguljennet Berdiliýewa, Türkmenistanyň Gahrymany, Birleşen Milletler Guramasynyň Bilim, ylym we medeniýet boýunça guramasynyň (ÝUNESKO) işleri barada Türkmenistanyň Milli toparynyň jogapkär sekretary, Adatdan daşary we doly ygtyýarly ilçisi, Türkmenistanyň Zenanlar birleşiginiň Merkezi Geňeşiniň agzasy Çynar Rüstemowa, Türkmenistanyň Gahrymany, Türkmenistanyň Dokma senagaty ministrliginiň «Dokmaçylar» medeni merkeziniň folklor-etnografiýa tans toparynyň çeper ýolbaşçysy Annajemal Nurmuhammedowa, Türkmenistanyň Mejlisiniň Ylym, bilim, medeniýet we ýaşlar syýasaty baradaky komitetiniň başlygy Baýramgözel Myradowa, Türkmenistanyň Demokratik partiýasynyň Ak bugdaý etrap komitetiniň partiýa guramaçysy, Ahal welaýat Ak bugdaý etrap Halk maslahatynyň agzasy, ilkinji zenanlar guramasynyň başlygy Çemen Könäýewa, «Zenan kalby» žurnalynyň baş redaktory, Türkmenistanyň Zenanlar birleşiginiň Merkezi Geňeşiniň agzasy Maýsa Taýjykowa, Aşgabat şäheriniň 165-nji çagalar bagynyň terbiýeçisi, Türkmenistanyň Zenanlar birleşiginiň Merkezi Geňeşiniň agzasy Oraztäç Nuryýewa, Aşgabat şäheriniň ýöriteleşdirilen 42-nji orta mekdebiniň 11-nji synp okuwçysy, Türkmenistanyň Döwlet sirkiniň «Galkynyş» milli at üstündäki oýunlar toparynyň 2-nji derejeli sirk artisti Medine Baýramdurdyýewa çykyş etdiler.
Ýurdumyzda amala aşyrylýan düýpli özgertmeler zenanlar hakynda edilýän alada bilen aýrylmaz baglanyşyklydyr. Türkmenistanda zenan mertebesiniň näderejede ýokary tutulýandygyny ýurdumyzda gender syýasatynyň ýöredilmegi hem tassyklaýar. Zenanlar hakynda alada, olaryň jemgyýetde eýeleýän ornuny giňeltmek hormatly Prezidentimiziň üns berýän esasy meselesidir. Halkara zenanlar güni mynasybetli hormatly Prezidentimiziň adyndan pul sowgatlary gowşurylýar. Ajaýyp zamanamyzda zenanlaryň hormatyna bagyşlanan dabaralar owadan ýurdumyzy gurşap alýar. Türkmenistanyň dürli kärhanalarynda, edaralarynda, bilim ojaklarynda gyz-gelinlere, zenanlara bagyşlanan dürli baýramçylyk çäreleri uly şatlyk-şowhuna beslenip geçirilýär. Şular dogrusynda edilen çykyşlar, buýsançly sözler hem-de mahmal owazly aýdymçylaryň ýerine ýetiren aýdymdyr sazlary Halkara zenanlar güni mynasybetli ýurdumyzyň gyz-gelinleri üçin mähirli gutlaglar bolup ýaňlandy.
Gyz-gelinlere, zenanlara, mukaddes enelere hormat goýmagyň, olary sylamagyň beýik nusgasyny görkezýän hormatly Prezidentimize, Gahryman Arkadagymyza aýdylýan alkyşlar ýürekleri joşdurdy.
