Halkara zenanlar güni – bu, ozaly bilen, dürli ýurtlaryň we medeniýetleriň zenanlaryny birleşdirýän gözellik baýramydyr. Şu günler tutuş ýurtda bu baýramçylyga bagyşlanan çäreler geçirilýär. Olary özgertmelere höweslendirilýär, tejribe we pikir alyşmaga meýdança döredilýär.
Zehinli çeper elli türkmen zenanlarynyň we Hytaý Halk Respublikasynyň diplomatik wekilhanasynyň wekilleriniň duşuşygynyň döredijilik giňişliginde ART-bazar geçirildi. Esasanam, taryhy we häzirki zaman şertlerinde Türkmenistanyň we Hytaýyň milli lybaslary ara alnyp maslahatlaşyldy.
ÝUNESKO-nyň howandarlygyndaky Dizaýn goşmak döredijilik jemgyýetiniň ýolbaşçysy Täjigül Gurbanowa duşuşygyň myhmanlaryny mübärekläp, Türkmenistanyň Gahrymany, ÝUNESKO-nyň işleri barada Türkmenistanyň milli toparynyň jogapkär sekretary, Türkmenistanyň Gahrymany Çynar Rustemowanyň adyndan gutlag sözlerini aýtdy.
Hytaý ilçihanasynyň geňeşçi-wekili Çžun Hua Halkara zenanlar güni bilen gutlady. Dost-doganlyk Türkmenistanda hormatly Prezidentimiz Serdar Berdimuhamedowyň we türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň parasatly ýolbaşçylygynda, zenanlaryň hukuklaryny goramakda we milli gymmatlyklary berkitmekde uly üstünlikleriň gazanylandygyny aýtdy.
– Ýurtda zenanlaryň öz başarnyklaryny doly ýerine ýetirmegi üçin amatly şertler döredilen. Men türkmen zenanlary bilen gürrüňdeş bolanymda, olaryň zähmetkeşligini, hoşamaýlygyny, paýhasyny, sabyrlylygyny we erjelligini duýýaryn. Bu adamkärçilik sypatlary olary Türkmenistanyň döwletine we halkyna ruhlandyryjy güýje hem wepaly goldawa öwürýär – diýip, ol nygtady.
Ýurdumyzda taryhy-medeni mirasy gorap saklamaga we ösdürmäge aýratyn üns berilýär. Amaly-haşam sungatynyň şöhratly ýoluny dowam etdirýän zenanlar özboluşly önümleri döretmegiň inçe syrlaryny nesilden-nesle geçirip, medeniýeti baýlaşdyrýar.
Duşuşykda etnograf we taryhy ylymlaryň kandidaty Ajap Baýryýewa dostlukly ýurduň wekillerini türkmen zenanlarynyň milli lybaslary bilen jikme-jik tanyşdyrdy, olary döretmegiň we geýmegiň inçe syrlary barada gürrüň berdi. Ýaş dizaýnerler häzirki zaman lybaslar bilen tanyşdyrdylar. Olarda milli keşdeleriň, nagyşlaryň elementleri sazlaşykly utgaşýar. Milli şaý-sepler dizaýneri Leýla Seýidowa hem enelerimiziň buýsançly dakynan gymmatly şaý-sepleri barada gürrüň berdi.
Duşuşygyň çäklerinde Hytaýyň Türkmenistandaky ilçihanasynyň wekili Li Ýuýpin «Milli hytaý lybas medeniýeti» bilen tanyşdyrdy. Bu usul özara medeniýetleri öwrenmäge mümkinçilik berdi we iki ýurduň taryhy mirasynyň baýlygyny hem köpdürliligini görkezdi.
Bu çäre Halkara parahatçylyk we ynanyşmak ýylynda aýratyn ähmiýete eýe boldy. Beýleki ýurtlaryň medeni mirasyny ykrar etmek we hormatlamak dostlukly gatnaşyklary pugtalandyrýar hem-de halkara derejesinde parahatçylyk ruhunyň kemala gelmegine ýardam edýär.
