Türkmenistana saparynyň çäklerinde Tatarystan Respublikasynyň (Russiýa) at gazanan artisti Albert Jalilow Maýa Kulyýewa adyndaky Türkmen milli konserwatoriýasyna baryp gördi. Myhman saz ugrundan zehinleriň taýýarlanylýan ojagynda talyplar bilen duşuşdy we wokalçylar üçin ussatlyk sapagyny geçirdi.
Sapagyň dowamynda talyplar meşhur kompozitorlaryň ariýalaryny we romanslaryny ýerine ýetirip, wokal babatda ukyp-başarnygyny görkezdiler. Albert Jalilow talyplara aýdym aýdanda dem almagyň usullary, şeýle hem sahnada özüni çeper we ynandyryjy görkezmek barada gymmatly maslahatlaryny berdi.
Kär babatda tejribe alyşmak konserwatoriýa bilen tanyşlyk wagty dowam etdi, bu ýerde myhman milli türkmen saz gurallary bilen tanyşdy. Sazandalary ýetişdirmekde türkmen halkynyň özboluşly aýratynlyklaryny we medeni ýörelgelerini görkezýän milli aýdym-sazlaryň goralyp saklanmagyna we ösdürilmegine uly üns berilýändigi oňa güýçli täsir etdi.
Dynç günleri ilkinji gezek Türkmenistana gelen russiýaly artist Albert Jalilow Aşgabatda Magtymguly adyndaky milli sazly drama teatrynyň sahnasynda Döwlet simfoniki orkestriniň sazandalary bilen bilelikde iki konsert berdi.
Tatarystan Respublikasynyň at gazanan artisti, opera aýdymçysy we aktýor, Russiýanyň nusgawy estrada žanrynda ökde ýerine ýetirijileriniň biri Albert Jalilowyň wokal taslamalaryna gatnaşmakda baý tejribesi bar. Onuň üstünliklerinden «Göni çykyş» (Russiýa-1) teleýaýlym bäsleşiginde ýeňiji bolandygyny, «Baş sahna» we «Romans romantikasy» atly (Medeniýet TW) taslamasyna gatnaşandygyny bellese bolar. Ol 120-den gowrak şäherde we 23 ýurtda konsert berdi.
Maýa Kulyýewa adyndaky Türkmen milli konserwatoriýasynda geçirilen ussatlyk sapagy Halkara parahatçylyk we ynanyşmak ýylynyň ýene bir şanly wakasy boldy, ol halklaryň arasyndaky medeni gatnaşyklaryň ähmiýetini nygtady. Bu çäre talyplary täze aýdym-saz üstünliklerine ruhlandyrdy we Türkmenistan bilen Russiýanyň arasyndaky dostlukly gatnaşyklary berkitmäge ýardam etdi.
