Daşoguz welaýatynda maýyl bahar günleriniň gelmegi bilen ýol düzümlerini häzirkizaman talaplaryna laýyk getirmek üçin işler güýçlendi.

Awtoulag ýollaryny ulanmak müdirliginiň hünärmenleri sebitiň etraplarynda birbada birnäçe awtoulag ýolunyň durkuny täzeleýärler. Deslapky işlerden soň Boldumsaz etrabynyň «10 ýyl Abadanlyk» we «Zähmetkeş» daýhan birleşiklerine barýan ýollaryň bölekleri asfalt ýazmaga doly taýýar edildi. Olaryň her böleginiň uzynlygy bir kilometr iki ýüz metrdir. Uzynlygy bäş ýüz metr bolan Daşoguz – Andalyp –Akdepe – Köneürgenç ýoly hem täzelenýär. Bu ýerde täze asfalt ýazylyp başlandy.

Soňky ýyllarda döwletiň ulag düzümlerini ösdürmek boýunça yzygiderli durmuşa geçirýän giň gerimli çäreleri netijesinde ulag ýollaryny degişli derejede giňeltmek we abat saklamak üçin welaýatda ähli zerur şertler döredildi, bu bolsa, öz gezeginde, ýük we ýolagçy daşamagyň möçberini ýokarlandyrmaga ýardam edýär.

Täze ýaşaýyş jaý toplumlary we ilatly ýerler, meselem, Köneürgenç etrabynyň «Täze ýol» geňeşliginiň çäginde gurulýan häzirki zaman şäher görnüşli şäherçe ýaly doly derejeli ýol-ulag düzümi bilen üpjün edildi.