Magtymguly adyndaky milli sazly drama teatrynda simfoniki sazlarynyň konserti diňleýjileriň alkyşyna mynasyp boldy. Nusgawy sazlaryň muşdaklary üçin Türkmenistanyň at gazanan artisti Resul Gylyjowyň ýolbaşçylygyndaky Türkmenistanyň Döwlet simfoniki orkestri çykyş etdi.
Konsert Wolfgang Amadeus Mosartyň «Seraldan ogurlanma» operasyna uwertýura bilen açyldy. Operada beýan edilýän tolgundyryjy wakany duýdurýan jadyly mukam bolup ýaňlandy.
Mosartyň «Orkestr we fortepiano üçin 23-nji konserti» iň meşhur we iň köp ýerine ýetirilen eseri bolsa gerek. Agşamky konsertde şu eser ýerine ýetirildi. Ony Türkmenistanyň at gazanan artisti Wladimir Mkrtumow çaldy.
Pianinoçy Mosartyň «Fantaziýa» atly başga bir eserini maksatnamadan daşgary ýerine ýetirdi. Bu onuň diňleýjilere sowgady. Tomaşaçylar gül desseleri we el çarpyşmalar bilen ussada sahy minnetdarlyk bildirdiler.
Konsertde Modest Musorgskiniň, Sergeý Prokofýewiň we Aleksandr Borodiniň eserleri ýerine ýetirildi.
Konsertiň ahyrynda simfoniki orkestriň sazandalary Mosartyň «Türk marşyny» maksatnamadan daşgary çaldylar. Dirižýor Resul Gylyjow diňe bir orkestre däl, eýsem, marşyň joşgunly sazyna kybap el çarpýan tomaşaçylara-da dirižýorlyk edýärdi.
Resul Gylyjow tomaşaçylara bilelikde geçiren ajaýyp agşam üçin minnetdarlyk bildirdi we bu taslamanyň sazandalar üçin synagdygyny aýtdy welin, zaldaky tomaşaçylar olar synagdan ... «Geçdiler!» – diýip biragyzdan jogap berdiler.
