Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy we Birleşen Milletler Guramasynyň Çagalar gaznasy (ÝUNISEF) olaryň abadanlygyny üpjün etmek maksady bilen Türkmenistanda çagalaryň hukuklaryny goramak babatda hyzmatdaşlygyny giňeldýär.
Degişli resminama Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň 4 ýyllygy mynasybetli Arkadag şäherinde geçirilen «Parahatçylyk we ynanyşmak ýyly: çagalaryň hatyrasyna halkara işiniň ösüşi» atly halkara maslahatda gol çekildi.
Bu ädim saglygy goraýyş, bilim, çagalary goramak we ýurtda durmuş goşulyşma meselelerini çözmekde hyzmatdaşlygyň täze tapgyryny alamatlandyrýar.
BMG-niň Çagalar gaznasynyň Türkmenistandaky wekili Jalpa Ratna Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň işiniň, goldawa mätäçlere kömek etmek däbiniň durmuşa geçirilmeginiň ajaýyp mysalydygyny belledi. 2021-nji ýylda döredilen gününden bäri gazna tutuş ýurt boýunça howandarlyga mätäç çagalara bejergi we lukmançylyk kömegini berýär.
Şeýle hem 2025-nji ýyl üçin ÝUNISEF bilen Türkmenistanyň Maliýe we ykdysadyýet ministrligi hem-de Türkmenistanda Adam hukuklary boýunça ygtyýarly wekil – Adalatçynyň edarasy iş meýilnamalaryna, Türkmenistanyň Bilim ministrligi we Tennis federasiýasy bolsa özara düşünişmek barada Ähtnamalara gol çekdiler.
