Halkara parahatçylyk we ynanyşmak ýylynyň çäklerinde Türkmenistanyň Döwlet çeperçilik akademiýasynda Italiýa Respublikasynyň Türkmenistandaky ilçihanasynyň we Türkmenistanyň Medeniýet ministrliginiň başlangyjy bilen italýan dizaýnerleri Gloriýa Trewizianiniň hem-de Klaudia Bellininiň, şeýle hem akademiýanyň talyby Jennet Agaýewanyň lybaslar toplumynyň moda görkezilişi geçirildi.
Bu halkara dostlukly çäre döredijilik ýokary okuw mekdebiniň talyplarynyň we mugallymlarynyň, Türkmenistandaky ilçihanalaryň işgärleriniň, suratkeşleriň we dizaýnerleriň ünsüni özüne çekdi. Moda görkezilişinden öň halklarymyzyň arasyndaky dostlukly gatnaşyklar we ähli ýurtlaryň zenanlarynyň halaýan häzirki zaman modasynyň ugurlary barada söhbetdeşlik boldy.
Çäräniň açylyş dabarasynda Italiýa Respublikasynyň Türkmenistandaky Adatdan daşary we Doly ygtyýarly ilçisi Luiji Ferrari ilkinji bolup çykyş etdi, soňra «Federmoda» milli assosiasiýasynyň ýolbaşçylary Antonio Frankesçini we Roberto Korbelli çykyş etdiler. «Federmoda» assosiasiýasy Italiýada dünýä moda ýörelgelerini kesgitleýän öňdebaryjy moda agentliklerinden biridir.
Türkmen halky zenanlaryň milli lybaslaryna baý medeniýete eýedir. Bu bolsa dizaýnerlere milli lybaslary döwrebap biçüwler bilen utgaşdyryp taýýarlamaga mümkinçilik döredýär. Gloriýa Trewiziani we Klaudia Bellini öz lybaslar toplumyny türkmen milli lybaslary bilen utgaşdyrypdyr: olara biçüw takyklygy, rahat reňk öwüşginleri we nepislik mahsus. Lybaslary görkezýän zenanlaryň her çykyşy tomaşaçylarda el çarpyşmalar döretdi. Lybaslar toplumynyň görkezilişi zehinli dizaýnerleriň uly toplumy hökmünde kabul edildi. Lybaslar toplumynyň üçüsinde hem giňden ulanylýan türkmen milli şaý-sepleri we keşdeleri muňa gowy ýardam etdi.
Biz: «Türkmen keşdesi italýan lybaslar toplumyna nädip düşdi?» – diýip, Jennet Agaýewadan soradyk.
– Munuň syryn açaýyn. Gloriýa we Klaudiýa bilen hyzmatdaşlyk edip bir ýarym aý Italiýada boldum. Pikirlerimizi paýlaşdyk. Türkmen zergärleriniň kümüş şaý-sepleri italýanlary haýran etdi, men bolsa olaryň işlerine milli keşdäni girizdim. Moda boýunça türkmen-italýan hyzmatdaşlygynyň iki tarapa hem döredijilik taýdan peýda getirendigi moda görkezilişinden soň üç dizaýneriň hyzmatdaşlygyň uzak möhletli meýilnamalaryny belländigi bilen subut edilýär.
