Türkmenistanyň Döwlet medeniýet merkeziniň Döwlet muzeýinde ýurdumyzyň hemişelik Bitaraplygynyň 30 ýyllygyna bagyşlanan «Bitaraplyk - parahatçylygyň kepili» atly duşuşyk geçirildi.
Çärä Döwlet muzeýiniň işgärleri, Magtymguly adyndaky Türkmen döwlet uniwersitetiniň, köpçülikleýin habar beriş serişdeleriniň we Türkmenistanyň Magtymguly adyndaky Ýaşlar guramasynyň wekilleri gatnaşdylar.
Duşuşyga gatnaşyjylar sebitde Garaşsyz, hemişelik Bitarap Türkmenistanyň dostlugyň, ylalaşygyň we ynsanperwerligiň daýanjy hökmünde ýokary abraýyna ünsi çekdiler. Duşuşygyň dowamynda ýurdumyzyň daşary syýasatda gazanan üstünlikleriniň we işjeň halkara hyzmatdaşlygynyň türkmen nusgasyna, hususan-da Bitaraplygyna we öňüni alyş diplomatiýasyna gyzyklanmanyň barha artýandygy nygtaldy.
2025-nji ýylyň 21-nji martynda BMG-niň Baş Assambleýasynyň 79-njy sessiýasynyň 61-nji umumy mejlisinde «Türkmenistanyň hemişelik Bitaraplygy» atly Kararnamanyň biragyzdan kabul edilmegi dünýä bileleşiginiň Türkmenistanyň Bitaraplyk derejesiniň yzygiderli ykrar edýändiginiň jedelsiz subutnamasy boldy.
BMG-niň Baş Assambleýasynyň döwletimiziň halkara derejesinde ýokary abraýynyň aýdyň subutnamasy we ählumumy parahatçylygy hem-de howpsuzlygy üpjün etmekde möhüm goşandynyň ykrar edilmegi hökmünde bu derejäni tassyklaýan Kararnamany üçünji gezek kabul edendigini bellemek gerek. Bu wakanyň Halkara parahatçylyk we ynanyşmak ýylynda bolmagy oňa aýratyn ähmiýet berýär, bu bolsa Türkmenistanyň halklaryň arasynda özara düşünişmegi we oňyn gatnaşyklary pugtalandyrmak ugrundaky ýadawsyz tagallalaryna aýratyn many berýär.
Duşuşygyň ahyrynda Gahryman Arkadagymyza we Arkadagly Gahryman Serdarymyza hemişelik Bitarap Türkmenistanyň halkara abraýyny berkitmek we dünýä arenasynda parahatçylyk hem-de hyzmatdaşlyk ýörelgelerini wagyz etmäge gönükdirilen ýadawsyz işlerinde geljekde hem üstünlikler arzuw edildi.
Duşuşyk Bitaraplygyň 30 ýyllygyny bellemek üçin işjeň taýýarlyklaryň çäklerinde ýurdumyzda geçirilen birnäçe çärelere sazlaşykly utgaşyp, baýramçylyk dabaralarynda parahatçylyk we oňyn gatnaşyklar ýörelgeleriniň ýurdumyzyň içeri hem-de daşary syýasatyna yzygiderli goşulmagynyň ýene bir mysaly boldy.
