Daşoguz welaýatynyň daýhanlary ýetip gelýän orak möwsümine üstünlikli taýýarlyk gördüler. Wagtynda geçirilen agrotehniki çäreleriň netijesinde, sebitiň ekin meýdanlarynda güýzlük bugdaýyň bol hasyly ýetişdi. Onuň esasyny ýerli howa şertlerinde özüni tanadan «Juwan», «Sähraýy», «Batko», «Alekseýewiç» we «Bezostaýa-100» ýaly ýokary hasylly hem dürli kesellere çydamly bugdaý görnüşleri düzdi.

Şu ýyl Akdepe etraby welaýatda iň uly hasyl öndürijidir. Onda bugdaý ekinleri 32 müň gektar ýeri eýeleýär. S.Türkmenbaşy etrabynda 30 müň alty ýüz gektar meýdanda bugdaý ýetişýär, Boldumsaz etrabynyň bolsa ýigrimi müň gektardan gowragyny galla ekinleri tutýar.

Ýetip gelýän orak möwsüminiň öňüsyrasynda öňümizdäki galla ýygymyny üstünlikli durmuşa geçirmek, däne daşamak we saklamak, tutuş hasyly goramak we gaýtadan işlemek üçin ähli zerur guramaçylyk çäreleri yzygiderli durmuşa geçirilýär. Hasyl möwsümine taýýarlygyň barşynda galla ýygýan kombaýnlaryň, elewatorlaryň we däne kabul ediş nokatlarynyň tehniki taýýarlyk derejesine we ýangyn howpsuzlygy meselelerine köp üns berilýär.

Öňümizdäki hasyl ýygymyna birnäçe ýüz «John Deere» we «CLAAS» kysymly ýokary öndürijilikli galla ýygýan kombaýnlaryň gatnaşmagyna garaşylýar, şeýle hem galla daşamak üçin öňkülerden köp ulag ulanylar.

Orak möwsüminde ýygym işleriniň ýokary depginini goldamak üçin, ähli hasyl enjamlaryna gyssagly hyzmat ediler. Giňişleýin döwlet maksatnamalarynyň tapgyrlaýyn durmuşa geçirilmegi netijesinde, sebitde däne ösdürip ýetişdirmegiň we düýpli gaýtadan işlemek ýola goýuldy. Çig maly gorap saklamak we taýýar önümleri öndürmek üçin, Daşoguz welaýaty halkara ülňülerine laýyk gelýän ýeterlik önümçilik kuwwatyna eýedir. Bu ýerde ýokary öndürijilikli üç sany un degirmeni, aglaba bölegi bir gezek saklamak we arassalamak, şeýle hem tohumlary taýýarlamak üçin 50 müň tonna çenli gallany kabul edip bilýän ýedi sany häzirki zaman elewatory üstünlikli işleýär.