Balkan welaýatynyň merkezi Balkanabat şäherindäki Beýik Saparmyrat Türkmenbaşy adyndaky Balkan welaýat döwlet drama teatrynda «Çalsana, bagşy!» bäsleşiginiň welaýat derejesindäki jemleýji tapgyry geçirildi.
Ýurdumyzyň mukaddes Garaşsyzlygynyň şanly 34 ýyllyk baýramyna bagyşlanyp Türkmenistanyň Prezidentiniň «Türkmeniň Altyn asyry» atly bäsleşiginiň çäklerinde geçirilýän bäsleşik aýdym-saz muşdaklary üçin ýatdan çykmajak ýakymly pursatlary peşgeş berdi. Şonuň ýaly-da bäsleşigiň dowamynda welaýatyň şäherleridir etraplarynda deslapky tapgyrlarda öňe saýlanan ýaş bagşy-sazandalaryň çeper döredijilik ussatlygy gözden geçirildi.
Halkara parahatçylyk we ynanyşmak ýylynyň ajaýyp dabaralarynyň, şanly wakalarynyň üstüni ýetiren özboluşly sungat baýramçylygy onuň ähmiýetini has-da artdyrdy. Şeýle-de türkmen halkynyň Milli Lideri Gahryman Arkadagymyzyň hem-de Arkadagly Gahryman Serdarymyzyň medeniýet we sungat ulgamyny nusgalyk derejede ösdürmek hakyndaky taýsyz tagallalaryndan ruhlanan zehinli ýaş bagşy-sazandalar bäsleşige has taýýarlykly gelendiklerini subut etdiler. Olar halk aýdym-sazlaryny, mukamçy kompozitorlaryň döreden eserlerini ýerine ýetirip, tomaşaçylaryň, talapkär emin agzalarynyň öňünde özleriniň döredijilik ukyplaryny, zehinlerini açyp görkezdiler. Hoş owazlara beslenen çykyşlaryň ählisi tomaşaçylar tarapyndan şowhunly, dowamly el çarpyşmalar bilen garşylandy. Ýaşlaryň ýerine ýetirijilik ussatlygy, sahna medeniýeti, milliligi, çeperçilik derejesi talapkär emin agzalarynyň adalatly bahasynda möhüm orun eýeledi.
Netijede, bäsleşigiň jemleýji tapgyry tolgundyryjy, täsirli pursatlara baýlygy bilen tapawutlandy. Bäsleşige gatnaşan 18-35 ýaş aralygyndaky bagşy-sazandalar onuň şertlerine laýyklykda, iki bagşy we iki sazanda ýeňijiler diýlip ykrar edildi. Ýaş bagşylardan Balkanabat şäher medeniýet merkeziniň bagşysy Serdar Režim, Balkan welaýat ýörite sungat mekdebiniň mugallymy Şamyrat Dawudow, ýaş sazandalardan Balkan welaýat ýörite sungat mekdebiniň 3-nji ýyl talyby Güljemal Ataýewa, Gyzylarbat etrabyndan Gaýgysyz Geldimämmedow ýeňiji bolup, olar «Çalsana, bagşy!» bäsleşiginiň paýtagtymyzda geçiriljek döwlet tapgyryna gatnaşmaga hukuk gazandylar. Ýeňijilere sowgatlar dabaraly ýagdaýda gowşuryldy hem-de jemleýji bäsleşikde üstünlikler arzuw edildi.
