Aşgabatda «Turkmentextile Expo – 2025»
halkara sergi-ýarmarkasynyň açylmagy bilen modaly lybaslaryň görkezilişi başlandy. Çäräniň birinji güni dünýä belli we milli markalar däp-dessurlaryň we döwrebaplygyň sazlaşykly birleşmegine öwrülen dürli kolleksiýalary hödürleýän ajaýyp agşam gala-şüweleňi bilen tamamlandy.
Türkmen dizaýnerleri diňe bir modaly lybaslary däl-de, eýsem, halkyň köptaraply medeniýetine çuňňur aralaşdyrýan ajaýyp täsir galdyryjy lybaslary görkezdiler. Tüýdük owazlarydyr lälelerden gadymy «Küştdepdi» tansyna we modelleriň elindäki üzärlik desselerine çenli – her bir element manylydy, türkmen ruhunyň ajap keşbini görkezýärdi.
Milli modanyň öňbaşçylarynyň biri bolan Türkmenistanyň Dokma senagaty ministrliginiň Aşgabadyň «Miras» modeller öýi ýokary derejesini ýene bir gezek subut etdi. Milli nagyşlary we häzirki zaman dizaýnyny ussatlyk bilen utgaşdyrýan lybaslar mydama kaşaň we saýry görünýär.
Ýaş zehinleriň arasynda «LN» nyşany we ony esaslandyryjy Läle Nepesowa has tapawutlanýar. Eýýäm Milanda at alan «Zodiak nyşanlary» lybaslar toplumy kaşaňlygy we arhetipik hekaýatlary sazlaşdyryp, çuň manyly moda döretdi.
Jennet Agaýewa türkmen lybaslarynyň taryhyny öwrenip, zenan lybaslaryna täze garaýşy hödürledi. Şalar Rahymow «Goç Ýigit» nyşany bilen «Oguzlar» lybaslar toplumynda erkekler lybaslar milli stiline täzeden garady. Ol däp-dessurlaryň häzirki döwürde ylham çeşmesi bolup biljekdigini görkezip, gadymy taýpa taryhyny häzirki adamlar üçin möhümligini görkezipdir.
«AINA SARI» türkmen simwolizminiň häzirki zaman görnüşleri bilen ajaýyp sepleşigini görkezdi. Onuň lybaslary geýilmäge degişli sungat, medeni kodlara we batyrgaý dizaýna baý.
Dana Hojamgulyýewanyň «DANA PERI» nyşany hasam özüne çekijidi. Suratkeşiň çotgasy bilen bezelen işlerinde millilik we çuňňur watançylyk duýgusy duýulýar. «DUMAN» modalar öýüniň şaý-sepleri bu ýere gelenleri haýran galdyrdy. Olaryň ajaýyp çykyşy Türkmenistanyň taryhy ýörelgelerini, deňiz we tebigy tematikalaryny sazlaşykly utgaşdyrdy.
Göwher Pirgulyýewa-Gowrne (Fransiýa) türkmen milli lybaslarynyň tebigylygyny we dinamikasyny belläp, oňa täze garaýyş hödürledi. Onuň işleri köp asyrlyk däp-dessurlar bilen häzirki zaman garaýşyň arasyndaky hakyky köpri boldy, «Vogue», «Elle» we «Harper's Bazaar» tarapyndan eýýäm bellenilen türkmen ýörelgeleri bilen Pariž kaşaňlyklarynyň arasynda üýtgeşik baglanşyk döretdi.
Türkmen zehinlerinden başga-da, günüň dowamynda tomaşaçylar Italiýadan, Gazagystandan, Singapurdan, Beýik Britaniýadan, Hindistandan, Özbegistandan we Gollandiýadan daşary ýurtly modaçylaryň önümleri bilen tanyşdylar, bu bolsa serginiň halkara gatnaşyklary üçin meýdança bolandygyny ýene bir gezek nygtady.
«Turkmenextile Expo – 2025»-niň guramaçylary diňe bir moda podiumlaryny däl, eýsem, häzirki zaman medeniýetiniň we jemgyýetiniň hakyky nyşanyny döretmegiň hötdesinden geldiler. Halkara parahatçylyk we ynanyşmak ýylynda Türkmenistanda ilkinji gezek geçirilen halkara sergi-ýarmarka pudagyň geljegini üýtgedip biljek medeniýetleriň, senetleriň, dokma önümleriniň we innowasiýa ideýalaryň hakykatdanam ajap dialogyna öwrüldi.
