Tomusky dynç alyş möwsümi – dynç almak we gyzykly pursatlar üçin köp garaşylýan wagt. Şu günler müňlerçe çaga tomusky dynç alyşlaryny ýurdumyzyň çagalar sagaldyş we dynç alyş merkezlerinde geçirýärler.

Mekdep okuwçylarynyň doly derejeli dynç almagyny üpjün etmek üçin zehinleri ýüze çykarmaga we täze hünärleri ösdürmäge kömek edýän sahnalaşdyrylan çykyşlary, konsertler we sport ýaryşlary ýaly dürli çäreler gurnalýar.

Golaýda Gökdere jülgesinde ýerleşýän «Demirýolçy» çagalar sagaldyş we dynç alyş merkezinde «Demirýollary» açyk görnüşli paýdarlar jemgyýetiniň we Türkmenistanyň Magtymguly adyndaky Ýaşlar guramasynyň goldamagynda «Kim çalasyn» bäsleşigi geçirildi. Oňa gatnaşanlar labyzly okamak, sanly ulgamlarda işlemek, surat çekmek, küşt oýnamak we dürli sport ýaryşlary boýunça başarnyklaryny görkezdiler.

Gökdere jülgesindäki «Bagtyýar nesiller» çagalar sagaldyş we dynç alyş merkezinde medeni-sport çäresi geçirildi. Şaşka we kiçi futbol ýaryşlary güýçlileri aýan etdi, ýeňijiler ýadygärlik sowgatlary bilen sylaglandy.

Şeýle çäreler şadyýan we sagdyn dynç alşa, şeýle hem çagalarda sporta söýgi döretmäge gönükdirilendir.

Tomusky dynç alyş möwsüminiň möhüm bölegi gözýetimleri ösdürmäge we kitap okamaga söýgini ösdürmekdir. Çagalar sagaldyş we dynç alyş merkezleri kitaphanalar bilen işjeň hyzmatdaşlyk edýärler, bilim duşuşyklaryny we sergileri guraýarlar. Gökdere jülgesinde ýerleşýän «Beýik Serdaryň ruhubelent nesilleri», «Şöhle» we «Nebitçi» çagalar sagaldyş we dynç alyş merkezlerinde kitap sergileri we kitaphanaçylar bilen duşuşyklary geçirildi.

Çagalar hekaýalary uly gyzyklanma bilen diňleýärler, türkmen halk ertekileri we olaryň hemmetaraplaýyn ösmegine goşant goşýan beýleki gyzykly edebiýatlar bilen tanyşýarlar.

«Awaza» milli syýahatçylyk zolagynda ýerleşýän «Ahal», «Balkan», «Daşoguz», «Lebap» we «Mary» çagalar sagaldyş we dynç alyş merkezleri hem dynç alýan çagalary mähirli garşy alýarlar. Dürli aňy ösdüriş çärelerinden başga-da, mekdep okuwçylary bu ýerde işjeň dynçdan lezzet alyp bilerler – «Awaza» akwaparkyna, «Älemgoşar» we «Jadyly kenar» dynç alyş seýilgählerine baryp, howuzlarda we sport meýdançalarynda wagt geçirip bilerler. Olar üçin gyzykly gezelençler, ýörüşler we sport ýaryşlary gurnalýar.

Ýurdumyzyň çagalar sagaldyş we dynç alyş merkezlerinde tomusky dynç alyşlary diňe bir dynç almak üçin mümkinçilik däl, eýsem, häzirki zaman, bilimli, giň pikirli we beden taýdan sagdyn nesli terbiýelemäge hemmetaraplaýyn çemeleşmekdir.