Türkmenistanyň Goranmak ministrliginiň Baş raýat goranyşy we halas ediş işleri müdirligi tebigy betbagtçylyklaryň we ýangynlaryň netijeleriniň öňüni almagy hem olary aradan aýyrmagy düzgünleşdirýär. Bularyň hemmesi döwlet, ýerli maksatnamalara, durmuş-ykdysady ösüş boýunça pudaklaýyn meýilnamalara girizilendir.

Bu gurluş raýat goragy harby bölümleriniň şahsy düzüminiň, merkezi we ýerli ýerine ýetiriji häkimiýetleriň, döwlet edaralarynyň ýolbaşçylarynyň, şeýle hem ilatyň hünär derejesini ýokarlandyrmak üçin maksatnamalary işläp düzüpdir. Mundan başga-da, betbagtçylykly, ýangyn we partlama howply, şeýle hem ýokanç keseller dörän ýagdaýlarynda zerur çäreleri göz öňünde tutýan aýratyn okuwlar bar.

Tomus möwsüminde şunuň ýaly işler çagalar saglyk merkezlerine geçirilýär, bu ýerde halas edijiler işgärlere we mugallymlara, şeýle hem çagalara howpsuzlyk düzgünleri hem özüňi goramak boýunça maslahatlar berýärler. Dynç alyş möwsüminde ýetginjekleriň arasynda degişli okuwlaryň geçirilmegi şäher şertlerinde-de, tebigy şertlerde-de, ýagny köpçülikleýin dynç alyş zolaklarynda, deňizde we dagda ýol hadysasy şikeslerini, garaşylmadyk hadysalaryň sanyny azaltmaga ýardam edýär; bu bolsa halas edijileriň, hukuk goraýjy edaralaryň we beýleki guramalaryň bilelikdäki tagallalarynyň netijesidir.

Her ýyl çagalar sagaldyş we dynç alyş merkezlerinde mekdep okuwçylarynyň arasynda «Ýaş halas ediji» atly bäsleşik geçirilýär. Şunuň ýaly çäreler Gullugyň sebit bölümleriniň işleýän welaýatlaryndaky çagalar edaralarynda: Ahal welaýatynda – «Ýaşyl ýaýla», Balkan welaýatynda «Gara altyn» we «Dürdäne», Daşoguz welaýatynda «Bagtyýar nesil», Lebap welaýatynda «Bagtyýarlyk», Mary welaýatynda «Arkadagly bagtyýar nesiller» çagalar sagaldyş we dynç alyş merkezlerinde, şeýle hem «Awaza» MSZ-de geçirilýär.

Toparlaýyn ýaryşlar ýangyna garşy sportuň alty görnüşini öz içine alýar. Çagalar höwes edip, gyzyklanmak, hatda hyjuw bilen bu tapgyrlary geçýärler, ýeňijiler guramaçylardan hormat hatlaryny we ýadygärlik sylaglaryny alýarlar.