Ýakynda geçen ýyl halkara derejede doglan gününiň 300 ýyllygy bellenen akyldar şahyr Magtymguly Pyragynyň adyny göterýän milli sazly drama teatrynda şahyra bagyşlanan «Pursat» atly sahna oýny sahnalaşdyryldy. Indi bolsa, ýagny şondan bir hepde soň şol teatryň sahnasynda döwürdeş şahyrymyzyň 85 ýyllygy mynasybetli goýlan «Gurbannazar Ezizow» sahna oýnunyň ilkinji görkezilişi bolup geçdi.

Sahna oýunlarynyň ikisini hem režissýor Mekan Jumabaýew sahnalaşdyrdy we olarda iki şahyryň hem keşbini açyp görkezmek üçin şol bir usuly – olaryň häsiýetlerini döredijiligine akyl ýetirmek arkaly öwrenmek usulyny ulanypdyr. Hiç hili meňzeşlik hakda gürrüň ýok – şahyrlaryň hersi özüçe özboluşly. Ýöne iki sahna oýunda-da islendik hereketiň başlangyç nokady – şygyr.

Teatryň tomaşa zaly Gurbannazar Ezizowyň şygryýetiniň dürli ýaşdaky muşdaklary bilen doldy. Olaryň sany ýylsaýyn artýan ýaly. Munuňam sebäbi şahyryň goşgularynda hiç hili ýasamalygyň ýoklugy, olaryň ýürekden çykýanlygy, mylaýymlygy, ynsanperwerligidir. Onuň goşgular ýygyndysyny eline alan islendik okyjy derrew Gurbannazar Ezizowyň zehininiň muşdagyna öwrülýär. Tomaşaçylaryň arasynda hormatly myhmanlar hökmünde şahyryň maşgala agzalary we ýakyn garyndaşlary bardy.

Sahna oýny doganlar Hydyr we Ylýas Amangeldýewiň ýazan edebi esasynda sahnalaşdyryldy. Awtorlar Gurbannazar Ezizow bilen ýakyn tanyş bolupdyrlar we hut şu-da oýunda öz täsirini goýupdyr. Şahyryň «Gijeki myhman» goşgusynyň gahrymany Ezraýylyň oňa geçen ömrüni gaýtadan gözden geçirmegine rugsat beren pursady sahna oýnuň başlangyjy boldy. Soňky pursatlarda şahyryň gözüniň öňünde adalatsyz gysga, ýöne adatdan daşary parlak durmuş parçalary gelip geçdi – şu-da oýnuň esasy hökmünde kabul edilipdir.

Türkmenistanyň sungatda at gazanan işgäri, suratkeş Batyr Bekmyradowyň sahna bezegi özboluşly: başynda adaty gullukçy ýaly ölüm perişdesiniň oturan ýönekeýje ýazuw stoly, ýerde – awtoryň çyrşap taşlan goşgularynyň garalamasy, ýokarda – asmanda bolsa durmuşyň nesil daragtyny, şygryýet daragtyny we mukaddesligiň nyşanyny aňladýan üç bölek bulut bar.

Nurly we şadyýan talyp durmuşy hem-de şahyryň goşun gullugyna gidýän sahnalary aýratyn şowly çykypdyr. Agzalary zalyň birinji hataryny eýelän we sahnada oturan şahyra ýüzlenýän çeperçilik geňeşini görkezýän parça adatdan daşary döredijilikli diýlip kabul edildi. Olar Ezizowyň şygryýetiniň gazaply garşydaşlaryna we goragçylaryna bölünipdirler.

Sahna oýnuň sazyny Türkmenistanyň sungatda at gazanan işgäri, kompozitor Röwşen Nepesow ýazypdyr. Saz dirižýor Derkar Jelilowyň ýolbaşçylygynda teatr orkestri tarapyndan ýerine ýetirildi. Teatr artistleriniň we Maýa Kulyýewa adyndaky Türkmen milli konserwatoriýasynyň hory, şeýle hem oýna gatnaşýanlaryň ýerine ýetiren aýdymlary saz bezegine ajaýyp goşundy boldy. Baýramhan Gaýyrowyň aýdymçy Atageldi Garýagdyýewiň keşbinde ýerine ýetiren aýdymlary aýratyn täsirli boldy.

Sahna oýny tamamlanandan soň, tomaşaçylar bilen hoşlaşmak üçin sahna çykanlaryň hemmesiniň Nury Halmämmedowyň Gurbannazar Ezizowyň sözlerine ýazan «Şadyýan gün» atly aýdymyny hor bolup aýtmaklary aýratyn bellenmäge mynasypdyr. Bu hakykat söýgüli türkmen şahyry baradaky sahna oýnunda ýakymly bir nokat boldy.

Gurbannazar Ezizowyň keşbini aktýor Döwran Çaryýew ýerine ýetirdi.

– Gysga pursadam bolsa, şeýle adamyň keşbinde ýaşamak – düşündirip bolmajak bagt – diýip, ol öz täsirleri barada gürrüň berýär. – Men talyplyk döwrümden bäri bu şahyryň zehininiň muşdagy. Şahyryň, ynsanyň, raýatyň ýagty ýadygärligine bagyşlanan «Gurbannazar Ezizow» sahna oýnunda baş keşbi ýerine ýetiriji bolanyma begenýärin.